Zań tilindegi qazaqsha termınderdiń mindetti sózdigi jasalýy múmkin

ASTANA. QazAqparat – Normatıvtik-quqyqtyq aktiler qoldanysyndaǵy qazaqsha termınderdiń mindetti sózdikteri jasalýy múmkin. Premer-Mınıstrdiń orynbasary Altaı Kólginov Májilis depýtattarynyń saýalyna bergen jaýabynda osyndaı málimet keltirdi, dep habarlaıdy QazAqparat tilshisi.

«Ǵylym jáne joǵary bilim mınıstrligi bekitilgen termınderge monıtorıng júrgizip jatyr. Onyń qorytyndysy boıynsha termınderdi birizdendirý jáne ózekti emes termınder men uǵymdardy aınalymnan alyp tastaý sharalary iske asyp jatyr. Qazirgi tańda qazaq tilindegi termınderdi jasaqtaý, onyń ishinde shet tilderinen engen termınderdi ıgerý boıynsha birqatar máseleler bar. Mamandardyń pikirinshe, shet tilinen engen termınderdi jappaı aýdarý qazaq tilin tez, ári tıimdi oqytýǵa óz áserin tıgizedi», - dep jazady Úkimet basshysynyń orynbasary.

Osy sebepten búginde shet tilinen enetin termınderdi qazaqsha balamasy bolǵan jaǵdaıda ǵana aýdarý usynylyp otyr.

«Sondaı-aq mindetti sıpattaǵy normatıvtik termınologııalyq sózdikterdi shyǵarý máselesi pysyqtalyp jatyr. Bul sózdikter birinshi kezeńde (boljam boıynsha 2026 – 2027 jyldar) mınıstrlik janyndaǵy respýblıkalyq termınologııa komıssııasy bekitken termınder negizinde ázirlenedi», - dep jazylǵan jaýapta.