Zań shyǵarý protsesi: Beketaev Jasyl jáne Aq kitap júıesin engizbek

ASTANA. QazAqparat - Qazaqstannyń zań shyǵarý protsesine Ulybrıtanııa tájirıbesin engizý úshin zerdeleý jumystary júrgizilmek. Bul týraly búgin QR Parlamenti Senatyndaǵy zań shyǵarý protsesin jetildirý máseleleri jónindegi Úkimet saǵatynda QR Ádilet mınıstri Marat Beketaev aıtty, dep habarlaıdy QazAqparat tilshisi.

«Zńnamalyq ózgeristerdiń teris saldary, ádettegideı, eki jaǵdaıda týyndaıdy. Birinshisi - ázirleýshi saldardy durys boljamaǵanda. Ekinshisi - engizilgen ózgertýler, biraq qoǵam, mysaly, túsindirý jumysynyń álsizdigine baılanysty oǵan daıyn bolmaǵanda»,- dedi ol.

Osyǵan baılanysty mınıstr Ulybrıtanııanyń tájirıbesin mysal retinde keltirdi.

«Zań jobasy Parlamentke engizilgenge deıin aldyn ala Jasyl kitap jáne Aq kitap paıdalanylady. Olar jappaı tırajben jarııalanady nemese aldyn ala konsýltatsııalar júrgizetin belgili adamdar tobyna tikeleı jiberiledi. Jasyl kitap - bul konsýltatıvtik sıpattaǵy qujattar. Olar memlekettik organdar júrgizip otyrǵan saıasatqa qatysty pikirler men usynystardy jınaýy úshin Úkimet tarapynan daıyndalady. Konsýltatsııalar júrgizilip ótkizilgennen keıin, odan ári yqpaldy Aq kitap jarııalanady. Bul, Úkimettiń naqty bir saladaǵy bolashaq saıasaty týraly málimdemesin bildiredi», - dep túsindiredi Marat Beketaev.

Mınıstrdiń aıtýynsha, onda zań jobasynyń aldyn-ala daıyndalǵan nusqasy bolýy, keıinnen kelip túsken eskertýler men usynystarǵa sáıkes ózgertilýi múmkin.

«Bizdiń zań shyǵarý protsesimizge osy tájirıbeni engizýdiń oryndylyǵy turǵysynan ony tereńirek zerdeleýdi josparlap otyrmyz», - dedi ol.