Zań normalary jumys istemeıtin erejege aınaldy: Depýtat kapıtaldy shetelge shyǵarý jedeldegenin aıtty
Depýtat qoldanystaǵy zańnamaǵa ózgerister engizý bir jaǵynan kapıtaldy shetelge shyǵarýdy edáýir qysqartýǵa, ekinshi jaǵynan respýblıkalyq bıýdjetke qarajat túsimin arttyrýǵa kómektesetinin atap ótti.
Senatordyń pikirinshe, baqylanatyn sheteldik kompanııalardyń qyzmetine erekshe nazar aýdarý kerek. Qazaqstannyń salyq zańnamasynda 2018 jyldan bastap olarǵa salyq salý týraly norma bar. Ondaǵy talaptyń máni, eger Qazaqstan Respýblıkasynyń rezıdentine tıesili sheteldik kompanııa shetelde salyq tólemegen bolsa, onda oǵan elimizde salyq salynatyn bolady.
«EYDU mamandarynyń baǵalaýy boıynsha qazaqstandyq normalar barlyq halyqaralyq talaptarǵa jaýap berdi. Degenmen, osy normalardy qabyldaǵannan keıin quramyna 55 el kiretin konventsııadaǵy elderge birden eki jyldyq shekteý engizildi. Osylaısha, bul norma kapıtal shyǵarylǵan ıýrısdıktsııalarǵa qoldanylmaıtyn boldy. Osydan keıin bul normalar odan ári ózgeriske ushyrady, atap aıtqanda, negizsiz jeńildiktermen tolyqtyryldy jáne tıimdi salyq stavkasynan nomınalǵa kóshti, osylaısha bul normalar jumys istemeıtin erejege aınaldy», - dedi Nurlan Bekenov.
Senator Qazaqstanda bolǵan sońǵy oqıǵalardy eskere kelgende, kapıtaldy elden shyǵarý tek jedeldegenin atap ótti. Bıyldyń qańtarynda ekinshi deńgeıdegi bankter 248 ret transshekaralyq tólem júrgizýden bas tartty, bul ótken jyldyń osy kezeńimen salystyrǵanda 2,4 ese kóp jáne 2021 jylǵy jeltoqsanmen salystyrǵanda 1,5 ese artyq.
«Shetelderden salyqtan jaltarý joldaryn izdemeıtin adal bıznes úshin bul normalar qıyndyq týǵyzbaıdy. Bul normalar bıýdjetke úlken soma ákelý úshin ǵana emes, sonymen birge olar elden kapıtaldy shyǵarýǵa kedergi keltirý úshin jaǵdaı jasaýy kerek edi. Qazir bul normalar jumys istemeıdi, qaıta kapıtaldy elden shyǵarýǵa jaǵdaı jasaıdy. Joǵaryda aıtylǵandardy eskere otyryp, baqylanatyn sheteldik kompanııalarǵa salyq salý týraly normanyń qoldanylýyn toqtata turatyn barlyq negizsiz jeńildikterdi dereý alyp tastaýdy, onyń ishinde salyq salýdyń tıimdi mólsherin paıdalanýǵa oralýdy suraımyz», - dep atap ótti senator.