Zań men tártip - ádildik ornatýdyń basty kepili – Jabal Erǵalıev
«Adamzat balasy álmısaqtan beri ádildik izdep kele jatqany bar. Sol ádildik máselesi álmısaqtan beri tolǵandyryp kele jatqandyǵy taǵy da anyq! «Ádildik joq» dep keı-keıde nalıtynymyz jáne de bar. Árkimniń óz aqıqaty men óz ádildigi baryn eskersek, tutas qoǵam men memlekettiń ádil bolýy asa mańyzdy másele. Biz barlyq órkenıetti memleketter sııaqty endigi arada Ádildikti tek Zańnan ǵana izdeýge tıistimiz. Zańǵa ǵana baǵynyp, Zańǵa ǵana júginýimiz kerek!», - deıdi ol.
Sarapshy atap ótkendeı, árıne, ol úshin Zań da saýatty jasalýy kerek jáne sol zańdardy júzege asyratyn da, olardyń oryndalýyn qadaǵalap, baǵyp otyratyn quqyq oryndary da Ádil bolýǵa tıisti. Jáne de Zańǵa baǵynyp, zańmen ómir súrý úshin Tártip te kerek, árkimniń tártipti bolmaǵy da kerek! Soǵan qarap, ádildik ár adamnyń óz adaldyǵynan, tártiptiliginen bastalar degen tujyrym jasalary bar.
Memleket basshysynyń 2019 jyldyń 12 maýsymynda óziniń prezıdenttik qyzmetine resmı kirisý rásiminde «Biz ádiletti memleket, ádiletti ekonomıka jáne ádiletti qoǵam quramyz»,- delingen osy bastamasynan keıin qazaqstandyq qoǵamda tyń ári jańa bir ózgerister serpilisi bastaldy. Qoǵamdaǵy ádildik ornyqtyrýdaǵy jaqsylyqtardy baıqamaý, sezbeý múmkin emes qazir.
«El Prezıdenti osy jolǵy Joldaýynda: «Qazaqstan halqy qazir múlde jańa saıası jaǵdaıda ómir súrýde. Sońǵy 5 jylda aýqymdy reformalar jasaldy. Elimizdiń saıası júıesi túbegeıli ózgerdi. Jurttyń sana-seziminde betburys bolyp jatyr. Halyqtyń quqyqtyq mádenıeti artyp keledi. Azamattardyń boıynda jańa ádetter, daǵdylar qalyptasyp, jańa qundylyqtar ornyǵýda. Saıası jáne qoǵamdyq bolmysymyz, mentalıtetimiz jáne mádenı kodymyz ózgere bastady. Bir sózben aıtsaq, Ádiletti Qazaqstan qurylyp jatyr»-dep qazaqstandyq búgingi qoǵamnyń ózgere bastaǵan búgingi bolmys ahýalyn atap kósetip otyrǵandyǵyn ábden oryndy dep sanaımyz», -deıdi qoǵam qaıratkeri.
«Bul ásirese, búgingi kúni túrli kózqarastar negizinde túrli pikirler men oı kózqarastarynyń taıtalasy, keı jaǵdaıda aıtysy men tartysy ýshyǵa túsip, keı jaǵdaıda jeke adamnyń ar-namysyn aıaq asty etý, bylapyt sóılep, dáleli joq jalǵan jala jabýǵa deıin baryp qalatyn, keı jaǵdaıda Qudaıǵa da, Quranǵa da, qarttaryna da qarsy shyǵyp, ata saltty mansuqtap, úlkenderdiń aıtqandaryna qulaq asýdan da qalyp bara jatqan bizdiń qoǵam úshin aýadaı qajet!», - dep esepteıdi Jabal Erǵalıev.