Zań kúshinen aıyrylǵan jerde jaýyzdyq bastalady -Jasulan Máýlenuly

NUR- SULTAN. QazAqparat – QR Bas prokýrory Berik Asylov qańtar oqıǵasynda adam óltirý, urlyq, qaraqshylyq, buzaqylyq qarý urlaý boıynsha 3 770 qylmystyq is qozǵalǵanyn, barlyǵy 230 adam qaza tapqanyn, onyń ishinde 19 áskerı jáne kúsh qurylymdary qyzmetkeri bar ekenin málimdedi. Tergelip jatqandardyń bárin «sútten aq, sýdan taza» etip kórsetýdiń qajettigi joqtyǵyn buǵan deıin de jazdyq, degen pikirin bildirdi Qazaq gazetin bas redaktory Jasulan Máýlenuly facebook paraqshasynda.

«Óıtkeni, zań óz kúshinen aıyrylǵan jerde jaýyzdyq bastalady.

Sonda zań buzylyp, jappaı tártipsizdikter júrip jatqanda da qarap otyrýymyz kerek pe?! Platon: «Men zańynda qaýqar kúshi joq jáne ol bireýdiń bıliginde bolatyn memleketti taıaýda kúıreıdi dep oılaımyn», – depti. Budan artyq ne aıtýǵa bolady?!

Ras, aqıqat aıtystan týady. Mysyr eliniń belgili ǵalymy Ábý Hýeını: «Sherý – eshqandaı sheshimge áser etpeıtin shara», – depti. Joqty izdeýge, attandap sóıleýge áýestigimiz basym. Biraq, emotsııa – eshýaqytta tıimdi sheshim qabyldaýdyń odaqtasy bola almaǵan. Al, azamattyq qoǵam qalyptastyrý máselelerine baılanysty belgili bir ustanym kerek. Onyń negizgi mindeti – saıası dıalog pen medıatsııa alańy bolýy tıis. Óıtkeni, qur attandaýdan másele sheshilmeıdi», deıdi jýrnalıst.