Zań konsýltattaryn jańa mindetter kútip tur

ASTANA. QazAqparat - Qazaqstanda zań konsýltanttarynyń kásibı palatalarǵa músheligin mindetti etý usynyldy. Bul týraly Májiliste «Advokattyq qyzmet jáne zań kómegi týraly» zań jobasyn tanystyrý barysynda QR Ádilet mınıstriniń orynbasary Janat Eshmaǵambetov málim etti, dep habarlaıdy QazAqparat.

«Zań jobasymen tıisti sharalar qarastyrylyp otyr. Barshasyna málim, búginde sotta azamattyń múddesin joǵary zańgerlik bilimi bar kez kelgen adam qorǵaı alady. Sonymen qatar osyndaı kómek sapasyz túrde usynylatyn jaǵdaılar oryn alyp jatady. Osynyń nátıjesinde azamattar óziniń quqyǵyn qorǵaı almaýmen qatar, shyǵyndarǵa tap bolady», - dep toqtaldy Eshmaǵambetov.

Sondyqtan da sotta klıentterdiń múddesin qorǵaıtyn adamdar úshin zań konsýltanttary palatalarynyń quramynda bolýy mindeti qarastyrylyp otyr. Olardyń mindetti músheligi zańgerlik kómek sapasy standarttaryn bekitýge múmkindik beredi. Sonymen qatar halyqqa kórsetiletin  zań kómegi sapasyn baqylaýǵa, qyzmetine durys qaramaıtyn zańgerlerdi jaýapqa tartýǵa jol ashylmaq.

«Zań kómeginiń basqa da túrlerin kórsetetin jeke tulǵalar zań konsýltanttary palatasyna erikti negizde qosyla alady», - dep túsindirdi mınıstrdiń orynbasary.

Zańgerlik kómek salasynda «monopolııaǵa» jol bermeý men básekelestikti damytý úshin jaǵdaı jasaý maqsatynda zań konsýltanttary palatalaryn kóptep ashý usynylýda. Atap aıtqanda, árbir palata adamdardy tartý men kórsetiletin qyzmettiń sapasyn arttyrý turǵysynda jaqsy jaǵdaı jasaýǵa talpynady dep kútilýde.