Zamanaýı ǵarysh salasyn qalyptastyrý el qaýipsizdigi úshin de berik negiz bolmaq - T. Musabaev

ASTANA. QazAqparat - Zamanaýı ǵarysh salasyn qalyptastyrý ǵylymı progress úshin ǵana emes, el qaýipsizdigi úshin de berik negizge aınalady. Búgin «Qazaqstandaǵy ǵarysh kúnderi» halyqaralyq semınaryn ashyp sóz sóılegen Investıtsııalar jáne damý mınıstrligi Aeroǵarysh komıtetiniń tóraǵasy Talǵat Musabaev osylaı málimdedi.

«Qazirgi tańda Qazaqstan birqatar joǵary ǵarysh tehnologııalaryna, zamanaýı jerústi ǵaryshtyq ınfraqurylymdarǵa ıe. Sosyn Qazaqstannyń áleýmettik-ekonomıkalyq múddesi úshin ǵarysh qyzmetiniń nátıjelerin tıimdi paıdalanýdy júzege asyra alatyn mamandar da bizde barshylyq. Sondyqtan da, elimizde aldaǵy ýaqytta zamanaýı ǵarysh salasyn qalyptastyra túsý jáne osy salany odan saıyn damytý ǵylymı-tehnıkalyq progress qana emes, el qaýipsizdigi úshin de berik negizge aınalatyndyǵyna senimdimin», - dedi alqaly jıyndy ashý barysynda komıtet basshysy T. Musabaev.

Eske sala keteıik, halyqaralyq sharaǵa qazaqstandyq mamandardan bólek Frantsııa, Germanııa, Ulybrıtanııa, Shveıtsarııa, Ispanııa, Norvegııa, Reseı, AQSh, Úndistan, Koreıa, Ýkraına, Qyrǵyzstan men Belarýs elinen 300-ge tarta ókilder qatysýda.

Eki kúnge ulasatyn semınar aıasynda sarapshylar ǵarysh salasy boıynsha jer resýrstaryn basqarý, aýyl shaýrashylyǵy jáne qorshaǵan ortany qorǵaý, geoaqparatyq júıeler jáne Qazaqstandaǵy Jerdi qashyqtyqtan zondtaý, tabıǵı resýrstar, kartografııa, qorǵanys jáne qaýipsizdik baǵyttary boıynsha pikir almasady.