Zaman talabyna saı ǵımarattardyń bolmaýy teatrlarymyzdyń basty problemasy bolyp otyr - M.Qul-Muhammed
«Teatrlarymyzdyń búgingi kúndegi eń basty problemasy - olarǵa arnap salynǵan zaman talabyna, bıik ónerdiń bılik talabyna saı ǵımarattardyń jetispeýshiligi. Tipti, bizge Keńes zamanynan mura bolyp qalǵan 34 teatrdyń 21-i ǵana tıptik ǵımaratta ornalasqan bolatyn. Qalǵandary HІH ǵasyrda nemese HH ǵasyr basynda túrli maqsattarǵa arnalyp salynǵan ár alýan ǵımarattarda ornalasqan. Máselen, 1983 jyly ashylǵan Shymkenttegi qýyrshaq teatryna 1991 jyly salynǵan Nıkolsk shirkeýiniń ǵımaraty berildi jáne teatr áli kúnge deıin sol ǵımaratta otyr», - dedi mınıstr.
Onyń atap ótýinshe, Táýelsizdik jyldary 20 jańa teatr ashylyp, onyń tórteýine zaman talabyna saı jańa ǵımarat turǵyzylǵan. Degenmen, oblystyq, tipti keıbir astanalyq teatrlar otyrǵan ǵımarattar áli kúnge deıin syn kótermeıdi.
«Sol sebepti, qurmetti Serik Nyǵmetuly, aldaǵy ýaqytta kez kelgen oblystyq basty mádenıet saraıy, basty óner ordasy bolyp sanalatyn oblystyq teatr ǵımarattaryn saldyrýǵa da erekshe kóńil bólýińizdi suraımyn. Siz oblystardy aralaǵanda osy máselege aıryqsha nazar aýdaratynyńyzdy jáne keıbir oblys ákimderiniń jańa teatr salý jónindegi usynystaryn qoldap júrgenińizdi bilemin», - dedi M.Qul-Muhammed Úkimet basshysyna qarata.
Sondaı-aq ol óńir ákimderine spetsıfıkasy, ereksheligi kóp, sahnalyq parametrleri, akýstıkasy sııaqty aıryqsha talaptary bolatyn jańa teatr ǵımarattary osyndaı mindetterge saı bolsa eken degen tilegin jetkizdi.
«Osy turǵyndan kelgende mınıstrlik sizderge kómek kórsetýge ázir»,- dedi ol.