Zagrebte QR Parlamenti Májilisiniń saılaý qorytyndysy talqylandy

NUR-SULTAN. QazAqparat – Qazaqstan Elshiliginde Horvat jurtshylyǵynyń kórnekti qoǵam, ǵylym jáne mádenıet qaıratkerleriniń, parlament depýtattarynyń, horvat-qazaqstan dostyq qoǵamynyń, Zagrebtiń Bosnııa mádenı qoǵamynyń jáne basqa da uıymdardyń qatysýymen «Qazaqstandaǵy parlament saılaýynyń qorytyndylary» atty dóńgelek ústel ótti.

Qazaqstan Elshisi Tólejan Barlybaev kezdesýge qatysýshylardy parlamenttik saılaýdyń qorytyndylary týraly habardar etip, Qazaqstanda daýys berý ulttyq jáne halyqaralyq quqyq normalaryna tolyq sáıkes joǵary uıymdastyrýshylyq deńgeıde ótkenin atap ótti. Dıplomat Qazaqstan Respýblıkasynyń táýelsizdiginiń 30 jyldyǵy aıasynda qazaqstandyq parlamentarızmdi nyǵaıtýdyń mańyzdylyǵyn atap ótti.

Horvatııanyń burynǵy Prezıdenti Stepan Mesıch pandemııaǵa jáne uıymdastyrýshylyq qıyndyqtarǵa qaramastan, Qazaqstan basshylyǵy epıdemıologııalyq qaýipsizdik sharalaryn qamtamasyz etkenin jáne azamattardyń erkin erik bildirýi men saılaýdy halyqaralyq baqylaý úshin barlyq qajetti jaǵdaılardy jasaǵanyn, bul álemniń basqa elderi úshin úlgi bolǵanyn atap ótti. Onyń baǵalaýynsha, Nursultan Nazarbaevtyń tóraǵalyq etken «Nur Otan» partııasynyń jeńisi Qazaqstan Tuńǵysh Prezıdentiniń qazaqstandyq memlekettiliktiń qalyptasýy men damýyna qosqan zor úlesin moıyndaý bolyp tabylady».

Horvatııanyń Sabor depýtaty Barbara Antolıch Výpora qazaqstandyqtardy parlamenttik saılaýdy sátti ótkizilýimen jáne kele jatqan Qazaqstan táýelsizdiginiń 30 jyldyǵymen quttyqtady. Ol ulttyq erik bildirýdiń nátıjeleri Qazaqstandaǵy parlamentarızm men kóppartııalyq demokratııalyq dástúrlerdi odan ári nyǵaıtýǵa qyzmet etetinine senim bildirdi.

Dostyq qoǵamynyń tóraǵasy Andrııa Karafılıpıpovıch pen Bosnııa mádenı qoǵamynyń jetekshisi Ferıd Dızdarevıch «Nur Otan» partııasy men onyń jetekshisi Nursultan Nazarbaevtyń Qazaqstannyń ishki saıası turaqtylyǵy men ornyqty damýyn qamtamasyz etý, «Halyq únine qulaq asatyn memleket» tujyrymdamasy jáne barlyq qazaqstandyqtardyń ál-aýqatyn jaqsartýǵa baǵyttalǵan áleýmettik-baǵdarly saıasat sheńberinde syndarly qoǵamdyq dıalogty qoldaý jónindegi uzaq merzimdi qyzmetin joǵary baǵalady.

Dóńgelek ústelge qatysýshylar jaqynda Horvatııadaǵy aıtarlyqtaı qıratýlar men adamdardyń qurban bolýyna ákep soqqan jer silkinisine baılanysty kóńil aıtý, janashyrlyq pen qoldaý bildirgeni úshin Qazaqstan basshylyǵyna zor rızashylyqtaryn bildirdi.

Qazaqstan elshiliginiń qyzmetkerleri jer silkinisinen zardap shekken otbasylarǵa kórsetken qoldaý men qarjylaı kómektiń mańyzdylyǵy atap ótildi. Sońynda kezdesýge qatysýshylar qazaq halqyna amandyq pen órkendeý tiledi.