Zaǵıp jandarǵa pernetaqta oılap tapqan aqtóbelik oqýshylar olımpıada júldegeri atandy
Aqtóbedegi Nazarbaev zııatkerlik mektebiniń 10-synyp oqýshylary Jannur Áıip pen Danııar Chýtenev Expo Sciences Mexico halyqaralyq vırtýaldy olımpıadasynda kúmis medal jeńip aldy. Olar olımpıadada nashar kóretin jáne zaǵıp jandarǵa arnalǵan « Braille Board» atty pernetaqta jobasyn usyndy. Oqýshylar qolda bar jobany jyl boıy jetildirip keledi.
«Bizdiń qurylǵy alty batyrmadan turady. Osy alty batyrmany basý arqyly kompıýterge áripterdi nemese tańbalardy engizýge bolady. Bolashaqta patent alýdy josparlap otyrmyz. Óıtkeni bul shynymen de biregeı joba», - dedi Jannur Áıip.
Mektep oqýshylary jasaǵan pernetaqta kólemi shaǵyn. Tipti adamnyń alaqanyna syıyp ketedi. Oqýshylar jańa qurylǵyny Aqtóbe qalalyq zaǵıp jáne nashar kóretin azamattarǵa arnalǵan kitaphanaǵa aparyp, pernetaqtany synaqtan ótkizip kórdi.
«Pernetaqtany apta boıy sol kitaphananyń qyzmetkeri qoldandy. Ol eshbir nusqaýsyz, birden kádesine jaratty. ıAǵnı, Braıl qarpin biletin adamdarǵa esh qıyndyq týdyrmaıdy», – dedi Jannur Áıip. Keıin qoldanýshy ne jazǵanyn seze alatyn dıspleı jasaý ıdeıasyn paıda boldy. Eki oqýshy qazir osy baǵytta jumys istep júr.
Aıta keteıik, Expo Sciences Mexico halyqaralyq olımpıadasyna álemniń 17 elinen barlyǵy 61 komanda qatysty. «Kompıýter jáne robototehnıka» nomınatsııasy boıynsha Jannur men Danııar ekinshi orynǵa ıelendi.