Ystyqkólde «Meıkın Azııa» tanymal mýzyka oryndaýshylarynyń III Halyqaralyq festıvali bastaldy

ShOLPAN ATA. QazAqparat – Ystyqkól jaǵasynda, Sholpan ata qalasyndaǵy «Rýh-Ordo» mádenı ortalyǵynda «Meıkın Azııa» tanymal mýzyka oryndaýshylarynyń ІІІ Halyqaralyq festıvaliniń ashylý saltanaty ótti, dep habarlaıdy QazAqparattyń menshikti tilshisi.

Úsh kúnge sozylatyn daryndylar baıqaýyna Qazaqstan, Qyrǵyzstan, Ózbekstan, Ázerbaıjan, Majarstan, Túrkııa, Soltústik Kıpr, Bosnııa jáne Gertsegovına, Reseı, Bolgarııa, Soltústik Makedonııa, Slovenııa men Serbııadan kelgen 18-35 jas aralyǵyndaǵy 17 jas oryndaýshy qatysyp jatyr.

Qyrǵyzstannyń Mádenıet, aqparat, sport jáne jastar saıasaty mınıstri Altynbek Maqsutov festıval óziniń ereksheliginiń arqasynda joǵary bedelge ıe bolǵanyn jáne turǵyndar arasyndaǵy dostyqty nyǵaıtýǵa baǵyttalǵanyn aıtty. Sonymen qatar ol 2013 jyly ótken alǵashqy «Meıkın Azııa» festıvalinde álemge tanymal qazaqstandyq ánshi Dımash Qudaıbergen jeńiske jetkenin atap ótti. Qazaqstandyq ánshi Dımash Qudaıbergen mýzykalyq baıqaý qatysýshylaryna vıdeoúndeý jasap, jas konkýrsanttar men qyrǵyz halqyna sálem joldady.

«On jyl buryn osy konkýrsqa qatysqanda úlken tájirıbe jınadym. Baýyrlas Qyrǵyz halqyna sáttilik pen bar jaqsylyqty tileımin», - dedi ánshi.

Resmı ashylý saltanatynan keıin mýzykalyq baıqaýdyń birinshi bólimi bastaldy. Onda qatysýshylar óz tilinde án oryndady. Ekinshi kúni olar tańdaýy boıynsha álemdik hıt oryndaýy tıis.

Mýzykalyq baıqaý tanymal otandyq jáne sheteldik ánshilerdiń qatysýymen ótetin gala-kontsertpen aıaqtalady.