Ystanbulda áıelderdiń beıbit sherýi ótti

ASTANA. QazAqparat - Túrkııada Halyqaralyq áıelder kúnine oraı beıbit sherý ótti. Aıtýly mereke qarsańynda Ystanbuldaǵy Bakyr-kóı aýdanynyń ortalyq alańyna jıylǵan bir top úkimettik emes uıym belsendileri názik jandylardyń quqyǵy aıaq asty etilip otyrǵandyǵyna narazylyq bildirdi, dep habarlaıdy Habar 2 4 telearnasy.

Uıymdastyrýshylar ásirese, Túrkııada turmystyq zorlyq-zombylyqtyń órship turǵanyna alańdaýly. «Úmit» qoǵamdyq qorynyń málimetinshe, byltyr otbasylyq daý-janjaldan 400-ge jýyq qyz-kelinshek ómirmen qosh aıtysqan. Onyń 85 paıyzy óz kúıeýi men súıiktisiniń qolynan qaza taýypty. Osylaısha Túrkııada ár 10 áıeldiń 4-ýi erler tarapynan zorlyq kóredi eken. Sondyqtan búgingi sherýge shyqqan belsendi top bılik ókilderinen názik jandardyń qoǵamdaǵy orny men rólin arttyrýdy talap etti.

«Elimizde áıelderdiń qoǵamdyq róline nemquraıly kózqaras qalyptasqan. Óıtkeni olardyń quqyqtary kún saıyn aıaqqa taptalyp jatyr. Al úkimet názik jandarǵa qarsy ozbyrlyq azaıdy dep aıtýdan jalyqpaıdy. Alaıda shynaıy ómirde jaǵdaı múldem bólek. Mysaly bıyl aqpan aıynda turmystyq zombylyqqa dýshar áıelderdiń sany ótken jylmen salystyrǵanda 38-ge ósken. Biz bul jantúrshigerlik áreketterge tosqaýyl qoıýymyz kerek. Óz quqyǵymyzdy osylaısha talap etpesek, eshkim bizdiń máselemizdi sheship bermeıdi», - deıdi sherýge qatysýshy stýdent Zehra Gıýnesh.