Ystanbulda Abaı atyndaǵy dańǵyly ashylyp, eskertkish qoıyldy
18 naýryzda Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdiniń Túrkııa Respýblıkasyna resmı sapary aıasynda Ystanbul qalasynda boldy.
Ystanbulǵa sapar kezinde QR SІM basshysy M.Tileýberdi Abaı Qunanbaıulynyń 2020 jylyndaǵy 175 jyldyq mereıtoıyna josparlanǵan Qazaqstannyń Túrkııadaǵy Elshiligi, QR Ystanbul Bas konsýldyǵy jáne Ystanbul Zeıtinbýrný aýdanynyń Merııasymen birlesip uıymdastyrǵan qazaq halqynyń uly tulǵasy, túrki áleminiń uly aqyny, kompozıtor, qazaq ádebıetiniń negizin qalaýshy Abaı Qunanbaıuly atyndaǵy alań pen eskertkishtiń saltanatty ashylýyna qatysty.
Saltanatty ashylý sharasyna Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi, Ystanbul qalasynyń meri Ekrem Imamoglý, QR Túrkııadaǵy Elshisi Abzal Saparbekuly, Zeıtinbýrný aýdanynyń meri Omer Arysoı, QR Ystambul Bas konsýly Álim Baıel jáne qazaq dıasporasynyń ókilderi qatysty.
Sonymen qatar Abaı atyndaǵy alań men eskertkishtiń ashylýy Ystanbul qalasy merııasynyń májilisiniń sheshimimen qabyldandy. Aqyn esimin alańǵa berý týraly sheshim Qazaqstannyń Túrkııadaǵy Elshiligi men Ystanbuldaǵy Bas konsýldyǵy júrgizgen jumystyń nátıjesinde júzege asty. Alańdaǵy Abaı músininiń avtory QR Kórkemóner akademııasynyń tolyq múshesi, qazaqstandyq músinshi Murat Mansurov.
Іs-shara Ystanbulda turatyn qazaq dıaspora ókilderi tarapynan uıymdastyrylǵan kontserttik baǵdarlamamen jalǵasyn tapty.
Іs-sharadan keıin QR Premer-Mınıstriniń orynbasary – Syrtqy ister mınıstri M.B. Tileýberdi, 2003 jyly Qazaqstan Respýblıkasynyń Tuńǵysh Prezıdenti Nursultan Nazarbaevtyń qatysýmen ashylǵan Zeıtinbýrný aýdanynda ornalasqan Abaı mektebine bardy.
Jýyrda mekteptegi Abaı eskertkishiniń jóndeý-jańartý jumystary atqarylyp, eskertkish aınalasyna gúlzar salynyp, jol jańartylyp, mektep ǵımaratynyń ishinde «Abaı buryshy» jasaqtaldy. M. Tileýberdi oqýshylarmen kezdesip, bilim ordasyna óziniń syıyn tartty.