Ystanbul meri Qazaqstandy Táýelsizdik kúnimen quttyqtady
«16 mln saılaýshylarymmen birge baýyrlas Qazaqstan halqyn Táýelsizdik kúnimen quttyqtaımyn. Eki memleket bolsaq ta, ózimizdi baýyrlas halyqtar retinde kóretinimiz bizdi óte baqytty etedi. Qazaqstannyń Táýelsizdik alýy biz úshin óte qýanyshty oqıǵa boldy. Men ol kezde ýnıversıtet stýdenti edim. Sol kezde bárimizdiń qýanyshtan tóbemiz kókke jetkendeı edi. Túrkııa - Qazaqstannyń Táýelsizdigin alǵash tanyǵan memleket. Osylaısha, Túrkııa durys jáne oń qadam jasady. Qazaqstannyń Tuńǵysh Prezıdenti Nursultan Nazarbaevty jáne Táýelsizdikke qol jetkizýge sebepker bolǵan barlyq adamdardy búgingi keremet kún - Táýelsizdiktiń 28 jyldyǵymen quttyqtaımyn. Dostarmyzdy Ystanbulǵa jáne elimizge shaqyramyz. Osy dostyǵymyzben túrli baǵyttaǵy baılanystarymyzdy, jumystarymyzdy nyǵaıta beremiz dep oılaımyn», - dedi qala basshysy Qazaqstan Respýblıkasynyń Táýelsizdik kúnine arnalǵan merekelik kontsertte.
Aıta keteıik, Qazaqstan Táýelsizdiginiń 28 jyldyǵy Túrkııanyń birneshe qalasynda toılandy. Táýelsizdik toıy 11 jeltoqsanda Qazaqstannyń Túrkııadaǵy Elshiliginiń resmı qabyldaýymen bastaldy. Resmı qabyldaýǵa Nur-Sultan qalasy ákimdigi Memlekettik akademııalyq fılarmonııasynyń Qazaq orkestri men «Qorqyt ata» kóne aspaptar saz toby arnaıy keldi.
50-den astam qazaqstandyq ónerpaz Ankara, Nıde, Býrsa, Nıde, Sakarııa jáne Túrkııanyń eń tanymal týrıstik aımaǵy - Kappadokııada óner kórsetti jáne sońǵy kontsert búgin Ystanbul qalasynda ótti.
Kontsertte Qazaqstannyń Túrkııadaǵy Tótenshe jáne ókiletti elshisi Abzal Saparbekuly Ystanbul merine qobyz ben qamshy syılady.