Yntymaq pen birlik irgeli isterge jeteleıdi - Gaýhar Aldambergenova
«Jer-jahandy sharpyǵan pandemııaǵa baılanysty búkil álem jurtshylyǵy alań kúı keship, halyq saýlyǵy synǵa túsken kezde QR Tuńǵysh Prezıdenti – Elbasy Nursultan Nazarbaevtyń otandastarymyzdy sabyrǵa, birlikke shaqyrǵan maqalasyn tereń tolǵanyspen qabyldadym. Elbasy egemendiktiń eleń-alań kezinen beri elimiz birlikti berik qaǵıda retinde basty baǵdar etip, dúnıe júziniń barlyq memleketimen ózara kelisim men dostyqqa negizdelgen dana ári kóregen saıasat ustanyp keledi. «Yrys qaıda barasyń? Yntymaǵy jarasqan elge baramyn» degen ulaǵatty sózdi basty maqsat etken halqymyz birliktiń, ózara tatýlyqtyń arqasynda kóptegen jetistikterge jetti. Táýelsizdik shejiresin paraqtasaq, keńester ımperııasynyń ornyna jańa turpatty, qýatty memleket qurý ońaıǵa túspegenin baǵamdaımyz. Turalap qalǵan ekonomıkany qaıta qalpyna keltirý, ony ýaqyt aǵymyna oraı damý jolyna túsirý – taqyr jerden taý turǵyzǵanmen birdeı ekendigin kóziqaraqty qaýym aıqyn ańǵarary anyq. Dese de «myń ólip, myń tirilgen» qazaq halqy ol qıyndyqtardy da eńserip ótti. Kóptegen álemdik daǵdarys kezderinde sátimen qabyldanǵan oń sheshim, utymdy árekettiń arqasynda elimiz eńsesin tik ustap ótken bolatyn. Osy jyldary Qazaq eliniń damýynyń jańa baǵyttary aıqyndalyp, qaryshty damýdyń tyń tetikteri iske qosyldy. Bunyń barlyǵy da ulttar men ulystardyń tatýlyǵy arqasynda júıeli júzege asty», - dedi Gaýhar Aldambergenova.
Mamannyń aıtýynsha, búginde adamzatqa qaýip-qater tóndirip turǵan jaman indet – koronavırýs dertimen kúresýde de halqymyz sabyrlylyq tanytyp, múmkindiginshe túrli ıgilikti ister atqaryp jatyr.
«Asqynǵan aýrýǵa daýa tabýda qazirgi zamannyń bilim-ǵylym jetistikteri sarapqa salynyp, dúnıe júziniń ǵalymdary ortaq maqsat jolynda birlese jumys isteýde. Halqymyz mundaı kúızelister kezinde sabyr saqtap, yntymaq-birligin bekite túsken. Qıyndyqtardy birlese jeńip otyrǵan. Bul týraly Elbasy óz maqalasynda keńinen toqtalǵan. Nursultan Ábishuly osynaý syndarly sátte jastarǵa úlken senim bildiretinin atap ótip, ulaǵatty sóz arnady. «Jańa óskin – jas urpaqqa aıtarym: táýelsizdik jyldary dúnıege kelgen sender keler jyly orda buzar otyzǵa tolasyńdar. Elimizdegi eń qýatty kúsh – ózderińsińder. Aǵa urpaq sender úshin qoldan kelgenniń bárin jasady, endi senderdiń de kúsh-qaırat jumsaıtyn kezderiń keldi. Jamandyqtan, jat ádetten saqtanyp, ıgi ister jasaýǵa umtylyńdar. Úlkenge – izetti, kishige – qamqor, bir-birińe dos bolyńdar. «Birińdi, qazaq, biriń dos, kórmeseń – istiń bári bos» degen Abaı atalaryńnyń ósıetin eshqashan esten shyǵarmańdar», – dedi Elbasy.
Rasynda da, urpaqtar sabaqtastyǵy bolǵan jerde ǵana ıgilikti ister eńserilip, izgilikke negizdelgen qoǵam ornaıdy. Babadan balaǵa mura bolyp kele jatqan bul qundylyq – kóldeneń paıda bolǵan qaýip-qaterlerdiń saldaryn joıýǵa da sep bolmaq. Tuńǵysh Prezıdent osy qaǵıda árbir otandasymyzdyń júreginiń tórinen oryn alýy qajettigin basa aıtty», - dedi rektor. «Halyq densaýlyǵy men memleket qaýipsizdigi – bir-birimen etene, egiz uǵymdar ekendigi belgili».
Rektor indetke oraı elimizde qalyptasqan ahýalǵa baılanysty Qazaq ulttyq qyzdar pedagogıkalyq ýnıversıtetinde qandaı irgeli ister qolǵa alynǵanyn aıtty.
«Qyzdar ýnıversıteti elimizdegi joǵary oqý oryndarynyń arasynda alǵashqylardyń biri bolyp qashyqtan oqytý tehnologııasyna tolyqtaı kóshti. Búginde oqý ornynda atalǵan tehnologııa boıynsha 810 pán oqytylýda. Ol bakalavrıattyń 2879, magıstratýranyń 380 jáne doktorantýranyń 58 bilim alýshylaryn qamtıdy. Sonymen qatar ýnıversıtette ǵalamtor jelisine qosylǵan arnaıy kompıýterlik synyptar daıarlandy. Úıinde tapsyrmalardy júkteýge múmkindigi joq oqytýshylar atalǵan oryndarda jumys isteı alady. Sondaı-aq barlyq jataqhanalardaǵy kompıýterlik synyptar da ınternetke qosylǵan. Ekinshiden, qashyqtan oqytý tehnologııasy arqyly mektep oqýshylaryna bilim berýdi ońtaıly uıymdastyrý úshin ýnıversıtet oqytýshylary mektep muǵalimderine ádistemelik kómek kórsetý boıynsha sheberlik synyptary men vebınarlar serııasyn bastady. Buǵan sebep te joq emes. Elimizdegi pedagog kadrlaryn daıarlaıtyn irgeli oqý ornynyń qashyqtan oqytý tehnologııasy boıynsha kópjyldyq tájirıbesi bar. Ýnıversıtettiń professor-oqytýshylary 8 jyldan beri atalǵan ádisti sátti paıdalanyp keledi. Pedagogıkalyq joǵary oqý oryndarynyń eń basty mıssııasy – mektep muǵalimderine ádistemelik turǵydan kómek kórsetý. Qazirgi kúnde muǵalim mamandaryn daıyndaıtyn ujymnyń aldynda atalǵan mindetti júzege asyrýdyń oraıy týyp otyr», - dedi oqý ornynyń basshysy.
Ýnıversıtettiń professor-oqytýshylary atalǵan shara sheńberinde qashyqtan oqytý tehnologııasynyń ereksheligi týraly óz tájirıbelerimen bólisip, ádistemelik kómek kórsetý boıynsha sheberlik synyptar serııasyn turaqty uıymdastyrýda.
Atap aıtqanda, alǵash bolyp Informatıka jáne qoldanbaly matematıka kafedrasynyń aǵa oqytýshylary «Bilim berýdegi onlaın platformalar», «Zoom platformasymen tanystyrý» taqyryptarynda vebınar ótkizdi. Oǵan Almaty qalasynyń Almaly, Alataý, Áýezov, Bostandyq, Medeý, Jetisý, Túrksib jáne Naýryzbaı aýdandaryndaǵy jalpy bilim beretin mektep, gımnazııa men lıtseılerdiń 100 muǵalimi qatysty. Aldaǵy ýaqytta bul shara jalǵasyn taba beretin bolady. Oǵan elimizdiń ózge de óńirlerindegi muǵalimder qatyspaq.
Qolǵa alynǵan shara barysynda bitirýshi kýrs stýdentteri pedagogıkalyq praktıka sheńberinde mektep oqýshylaryna onlaın formatta tapsyrmalardy oryndaýǵa, tárbıe jumysy boıynsha ınteraktıvti is-sharalardy uıymdastyrýǵa, sandyq tehnologııalardy qoldana otyryp sabaqtarǵa daıyndalýǵa kómek kórsetýde.
Vebınarlar men sheberlik synyptary Qyzdar ýnıversıtetiniń YouTube jelisindegi resmı paraqshasynda jarııalanady.
Jaqynda Qazaq ulttyq qyzdar pedagogıkalyq ýnıversıtetinde oqytýshylar men stýdentterge qashyqtan oqytý boıynsha ádistemelik jáne tehnıkalyq qoldaý kórsetetin Call-ortalyǵy ashyldy. Qyzmettiń basty artyqshylyǵy – oqý orny týraly jan-jaqty aqparat berý, qashyqtan oqytý tehnologııasy boıynsha atqarylyp jatqan jumystar týraly tolyqqandy málimetpen qamtamasyz etý jáne osy taraptaǵy ózge de saýaldarǵa keńinen jaýap berý.
Sonymen qatar, jas ǵalym-pedagogtar onlaın dárister serııasyn bilim alýshylarǵa usyna bastady. OPEN U jobasy aıasynda qolǵa alynǵan sharanyń maqsaty – elimizdiń jetekshi pedagogıkalyq joǵary oqý ornynyń oqytýshylarynyń qatysýymen daıyndalǵan onlaın-kýrstardy qoljetimdi etý jáne túrli salalar boıynsha jastardyń bilim deńgeıi men ıntellektýaldyq áleýetin arttyrý.
«Sóz sońynda Elbasy Nursultan Nazarbaevtyń bul úndeý-maqalasy qıyn kúnderde árbir otandasymyzdyń kóńiline senim uıalatqandyǵyn erekshe atap ótkim keledi. Ol senim bolashaqqa degen úkili úmittiń odan ármen oıanýyna yqpalyn tıgizdi dep oılaımyn. Qazirgi kúnde aty jaman indetpen kúres elimizde tabandy túrde júrgizilip jatqanyn baǵamdap otyrmyz. Ultymyzda «Saýsaq birikpeı, ıne ilikpeıdi» degen ataly sóz bar. Búgingideı qıyn-qystaý kezeńde týǵan halqymyzdyń yntymaq pen aýyzbirshilik tanytqany durys dep baǵamdaımyz. Elbasynyń «Birlese bilgen el bárin jeńedi» atty maqalasy kóldeneń kelgen keselge qaıyspaýdy, belimizdi bekem býyp, bereke-birligimizden aıyrylmaýdy basty maqsat tutady», - dedi Gaýhar Aldambergenova.