Ybyraı Altynsarınniń ómiri men qyzmeti jaıynda jańa kitap jaryq kórdi

ALMATY. QazAqparat - 22 jeltoqsanda «Almatykitap» baspasynan Ybyraı Altynsarınniń ómiri men qyzmeti jaıynda «Dalanyń taza bulaǵy» kitaby jaryq kórdi. Kitap muraǵat, murajaı jáne ekspedıtsııa zertteýleriniń materıaldaryna negizdelip jazylǵan.

Ekspedıtsııalyq top Reseı jáne Qazaqstan aýmaǵynda murajaılarynan fotosýretter men vıdeoderekterge qol jetkizgen.

Kitap ishine ornalastyrylǵan QR kod kómegimen derekti fılm, sondaı-aq aýdıoıllıýstratsııa retinde tanysýǵa, Y. Altynsarın murajaıyna sapar shegýge múmkindik te bar.

Týyndy Almaty qalasynda ótken «Uly Jibek jolymen-2022» halyqaralyq kórmesi aıasynda «Jyldyń úzdik kitaby» nomınatsııasy boıynsha gran-prıdi de ıelendi.

Sóz basyn baspa prezıdenti – Gaýhar Aıtjanqyzy Saımasaeva aldy.

«Kitapty tyń materıaldarmen tolyqtyrý úshin oǵan laıyqty fotosýretter, vıdeolar kerek boldy. Sol úshin bizdiń Almatykitap baspasynan arnaıy ekspedetsııalyq top quryldy. Olar Altynsarınniń týǵan jeri Arqalyqtan bastan, Torǵaı, Qostanaı, tipten sonaý Reseıdegi Troıtsk jerine deıin baryp, eksklıýzıvti materıaldardy jınady. Onyń bári osy kitapqa engizildi», - degen ol týyndynyń shyǵý tarıhyna sholý jasap, kelgen qonaqtarǵa alǵysyn aıtty.

Aıtýly sharaǵa QR Jazýshylar Odaǵy tóraǵasynyń orynbasary Baýyrjan Jaqyp, Qazaqstan Jazýshylar Odaǵynyń múshesi, Y.Altynsarın jaıynda jazylǵan «Altynsarın alaýy» atty tórt bólimdi tarıhı romannyń avtory Nurdáýlet Aqysh, «Qazaqstan dáýiri» gazetiniń bas redaktory, jýrnalıst Ertaı Aıǵalıuly, «Bilimdi el» gazetiniń jetekshisi Lıazzat Týrkestanova syndy el rýhanııatyna eńbek sińirgen tulǵalar men kitap isiniń damýyna úles qosyp júrgen jaısań jandar jınaldy.