Ybyraı Altynsarınniń 180 jyldyǵy qalaı atalyp ótilýde
Jıyn barysynda Qostanaı oblystyq Ybyraı Altynsarın memorıaldyq mýzeıiniń «Dalanyń dara ustazy» kóshpeli kórmesi ashyldy. Jáne ybyraıtanýshy-ǵalym Serikbaı Ospanovtyń «Ybyraı joly» kitabynyń tusaýkeser rásimi ótti.
«Qurmetti elorda turǵyndary! Barshańyzdy uly aǵartýshy Ybyraı Altynsarınniń 180 jyldyq mereıtoıy aıasynda Ulttyq mýzeıde uıymdastyrylǵan kórmeniń ashylýymen quttyqtaımyn! Ultymyzdyń órkenıet kóshine ilesip, bilim jáne ǵylym jolyna túsýine zor yqpal etken dara tulǵanyń eńbegi ólsheýsiz. Qazaq dalasynda bilimniń shyraǵyn jazyp, mektep ashý isin jolǵa qoıǵan Ybyraı Altynsarın artynda óshpes iz, ólmes mura qaldyrdy», - dep jazylǵan Qostanaı oblysynyń ákimi Arhımed Muhambetovtyń quttyqtaý hatynda.
Ákimniń aıtýynsha, ult ustazynyń esimin qasterleý maqsatynda Qostanaı oblysynda birqatar is-shara qolǵa alynǵan.
«Aǵartýshynyń týǵan mekeni men máńgilik tynys tapqan jeri «Qazaqstannyń kıeli oryndary» tizimine engizildi. «Rýhanı jańǵyrý» baǵdarlamasy aıasynda ustazdyń kesenesi qaıta jańǵyrtyldy. 180 jyldyq mereıtoıdyń bastamasy retinde oblys ortalyǵynda kórnekti eskertkish boı kóterdi. Aǵartýshynyń esimi berilgen kósheler, mádenıet jáne bilim oshaqtary jóndeýden ótkizilýde. Uly ustaz murasyna degen qamqorlyq budan ári de jalǵasyn taba bermek. Búgingi basqosýda Ybyraı murasyn uzaq jyl zerttep júrgen kórnekti aqyn, ǵalym Serikbaı Ospanovtyń «Ybyraı joly» kitabynyń tusaýkeser rásimi jasalady. Bul qundy eńbek Ybyraıtaný ǵylymyna qomaqty úles qosyp, kóptegen jańa zertteýlerge arqaý bolary sózsiz. Igi sharanyń ótýine múmkindik jasaǵan Ulttyq mýzeı ujymyna, qoldaý kórsetken zııaly qaýym ókilderine shynaıy alǵysymdy bildiremin», - dep jazǵan A. Muhambetov.
Sonymen birge, QR bilim jáne ǵylym vıtse-mınıstri Sholpan Qarınova muǵalimderge uly pedagog atyndaǵy medal belgilengenin jetkizdi.
«Ózderińizge belgili, árbir mektep oqýshysy Ybyraıdyń «Kel balalar oqylyq, oqyǵandy kóńilge yqylaspen toqylyq» degen sózin alǵash mektep tabaldyryǵyn attaǵan kúnnen estip, bilim men ǵylymǵa, tanymǵa degen qushtarlyǵyn oıatady. Vedomstvalyq nagrada retinde pedagogtarǵa Y. Altynsarın medali belgilengen. Bul medaldi jylyna 230-dan astam pedagogtar ıelenedi. Olardyń barlyǵy da Y. Altynsarın salǵan sara jolmen bala oqytý isin júrgizip keledi. Bıyl el Prezıdenti Q. Toqaev tapsyrmasymen «Oqýǵa qushtar mektep» jobasy barlyq mektepterde júrgizilip keledi. Onyń aıasynda barlyq bilim mekemeleri oqýlyq, kórkem ádebıet satyp alyp, klassıkalyq ádebıet oqytý boıynsha úlken jumys josparlap otyr. Munda da Ybyraı ilimin taratý bizdiń aldymyzdaǵy úlken mindetterdiń biri dep bilemin», - dedi Sholpan Qarınova.