Ybyraı Altynsarın týraly jańa jınaq jaryq kórdi

NUR-SULTAN. QazAqparat – QR Ulttyq mýzeıinde ybyraıtanýshy-ǵalym Serikbaı Ospanovtyń «Ybyraı joly» kitaby tanystyryldy, dep habarlaıdy QazAqparat tilshisi.

«Búgingi shara Ybyraı Altynsarınniń 180 jyldyǵyna baılanysty uıymdastyrylǵan. Bul – árıne bastamasy. Jalpy onyń otandyq bilimniń damýyna qosqan úlesi, el tarıhyndaǵy orny áli de jetkilikti zerttelmedi, baǵalanbaı keledi dep oılaımyn. Ulttyń uly ustazy atanǵan adamdy qalaı ulyqtasa da, artyq etpeıdi», - dedi kitap avtory tilshilerge bergen suhbatynda.

Onyń aıtýynsha, qazaq balalar ádebıetiniń atasy atanǵan Altynsarınniń entsıklopedııasy áli shyqpaǵan. Qazaq balalar ádebıetiniń atasy delinetin Y. Altynsarınniń aty Qazaqstan jazýshylar odaǵy shyǵarǵan anyqtamalyqta da joq.

«Men 30 jyl boıy Ybyraı Altynsarınniń ómiri men shyǵarmashylyǵyn zerttedim, 13 kitap shyǵardym. Ár kitap shyqqanda taǵy bir jańalyqtardy taýyp alamyn. Búgingi «Ybyraı joly» kitaby 800 betten, 6 taraýdan turady. Memlekettik arhıvten bastap, Omby, Máskeý, Qazan, Ybyraı oqyǵan Orynbor arıhvterinen alynǵan tyń málimetter engizilgen. Bul eńbek sonysymen qundy. Mysaly, Ybyraıdyń Sátemir han degen áńgimesi bar. Sol Sátemir han surastyra kele, Aqsaq Temir bolyp shyqty. Hannyń kóp kezige bermeıtin esimin bilgeni de – Ybyraıdyń danyshpandyǵy», - deıdi zertteýshi.

Aıta keteıik, jıyn barysynda Qostanaı oblystyq Ybyraı Altynsarın memorıaldyq mýzeıiniń «Dalanyń dara ustazy» kóshpeli kórmesi ashyldy jáne «Úmit etken kózimniń nury balam...» atty dóńgelek ústel ótti.