Ybyqty saıda taýǵa qashap jazý jazǵan mádenıet úıiniń dırektory qyzmetinen ketti

AQTÓBE. QazAqparat – Mańǵystaýdaǵy Ybyqty saıyna qashap jazý jazyp, keıin keshirim suraǵan Aqtóbe qalalyq zaǵıptar úıiniń dırektory Manat Kósherbaev óz erkimen jumystan ketti, dep habarlaıdy QazAqparat tilshisi.

Aqtóbe qalalyq mádenıet jáne tilderdi damytý bóliminiń basshysy Gúljaına Bısenǵalıevanyń aıtýynsha, qalalyq zaǵıptar úıiniń dırektory Manas Kósherbaev qyzmetinen ketti.

«Manas Kósherbaev qalaǵa kelgen soń keshe shaqyrtyp aldyq. Ol sol kezde óz erkimen jumystan shyǵatynyn aıtyp, aryz jazdy. Ákimshilik jazany polıtsııa qoldanady. Al jumystan shyqqan adamǵa tártiptik jaza qarastyrylmady»,- dedi Gúljaına Bısenǵalıeva.

Eske salsaq, eńbek demalysyna Mańǵystaýǵa barǵan ánshi, Aqtóbe qalalyq zaǵıptar úıiniń dırektory Manas Kósherbaev borly taýǵa qashap jazdy.

Keıin «Aqnázik» dep jazylǵany kórsetildi.

Kóp uzamaı Manas Kósherbaev áleýmettik jelidegi paraqshasynda jazba qaldyryp, beıneúndeý jarııalady.

«Men Kósherbaev Manas Maratuly 24 tamyzda Mańǵystaý oblysy Aqtaý qalasy Ybyqty saıda bolǵan jaǵdaıǵa baılanysty túsinikteme bergim keledi. Ybyqty saı – Mańǵystaýdyń kórkem jerleriniń biri. Ókinishtisi, qaraýsyz qalǵan. Joly óte nashar, jan-jaǵy qoqysqa toly. Sol ádemi, keremet úńgirdiń ishi tolǵan jazý, ádepsiz sózder. Sondaı bir dóreki sózdi ádemi esimge aınaldyrmaq nıetim ǵana boldy. Ańdaýsyz jaza bastym! Jańylmaıtyn jaq, súrinbeıtin tuıaq bolmaıdy. Asa qatty sókpeńizdershi! Tarıhı jerge qyldaı qııanat qylý oıymda da bolmady. Barsha otandastarymnan, Mańǵystaý jurtynan basymdy ıip keshirim suraımyn! Ǵafý etińizder»,- dep keshirim surady.