ıAdrolyq qarýdyń qory barlyq adamzatty joıyp jiberýge jetkilikti - Goı beıbitshilik qory

ASTANA. QazAqparat - Goı beıbitshilik qorynyń prezıdenti Hıroo Saıondjı Astanaǵa kelip, ıadrolyq qarýsyzdandyrý máselesine arnalǵan konferentsııaǵa qatysty. Osydan eki jyl buryn QR Prezıdenti Nursultan Nazarbaevqa atalǵan qordyń arnaıy syılyǵy tabystalǵan bolatyn, dep xabarlaıdy QazAqparat tilshisi.

H.Saıondjıdiń aıtýynsha, qazirgi ıadrolyq qarýlardyń qaýqary Hırosıma men Nagasakıge túsken bombalardan áldeqaıda qatty. Sol qarýdyń qory barsha adamzat pen tabıǵatty joıyp jiberýge jetkilikti. Álem boıynsha jyl saıyn áskerı salaǵa 1,7 trln AQSh dollary jumsalady. Al ol aqshanyń 10 protsenti kedeıshilik, asharshylyq, sýdyń tapshylyǵy, tabıǵı apattar sııaqty problemalardy sheshýge baǵyttasa, 2030 jylǵa deıin turaqty damý maqsattarynyń bárin oryndap shyǵýǵa bolady.  "Japonııa men Qazaqstan ıadrolyq synaqtardyń qaýip-qaterin jaqsy biledi. Menińshe, onyń bárin eshqashan umytpaý qajet. Al, eń bastysy, qazirgi jas urpaqqa ıadrolyq qarýdyń qanshalyqty qaýipti ekenin jetkizýimiz kerek. Sonda ótken ǵasyrdyń qatelikteri eshqashan qaıtalanbaıdy", - dedi H.Saıondjı.

Osy oraıda qor basshysy Qazaqstannyń ıadrolyq qarýsyzdandyrý salasyndaǵy eńbegin erekshe atap ótti. Sebebi ondaı bastamalar bolmasa, álem qaýymdastyǵynyń sana-sezimin ózgertý múmkin emes. "Biz Qazaqstannyń ıadrolyq qarýsyzdandyrý salasyndaǵy eren eńbegin joǵary baǵalaımyz. Atalǵan memleket Ortalyq Azııany ıadrolyq qarýsyz aımaq retinde qurýǵa úlken úles qosty dep bilemiz. Qazaqstannyń ıadrolyq synaqtarǵa tyıym salý jónindegi jalpyǵa ortaq kelisimdi kúsheıtý jolyndaǵy jumysyn da erekshe atap ótken jón. Atom energııasyn tek beıbit maqsatta qoldanýǵa qatysty ustanymdaryńyzdy bári biledi. Sol úshin álem qaýymdastyǵy Qazaqstanǵa alǵys aıtýy qajet", - dep atap kórsetti H.Saıondjı.

Aıta keteıik, búgin Astanada "Qazaqstan men Japonııanyń ıadrolyq qarýsyzdandyrý salasyndaǵy yntymaqtastyǵy: Bir taǵdyr, jalpy maqsat" taqyrybynda xalyqaralyq konferentsııa ótti. Sharanyń uıymdastyrýshylary QR Tuńǵysh Prezıdenti - Elbasy qory janyndaǵy Álemdik ekonomıka jáne saıasat ınstıtýty, sondaı-aq, Goı beıbitshilik qory. Konferentsııada ıadrolyq qarýsyzdandyrý salasyndaǵy ózekti máseleler talqyǵa salyndy. Al QR Parlament Májilisiniń depýtaty Abaı Tasbolatov keńester kezinde áskerdiń ıadrolyq soǵysqa qalaı daıyndalǵanyn aıtyp berdi.