ıAdrolyq qarýdy taratpaý Qazaqstannyń negizgi baǵyttarynyń biri - sarapshy

ASTANA. QazAqparat - Álemde ıadrolyq qarýdy taratpaý ustanymy Qazaqstannyń syrtqy saıasattaǵy mańyzdy baǵyttarynyń biri. Bul pikirdi QR Prezıdenti janyndaǵy strategııalyq zertteýler ınstıtýty dırektorynyń orynbasary, saıasattaný ǵylymynyń doktory Sanat Kóshkinbaev bildirdi, dep habarlaıdy «QazAqparat» HAA tilshisi.

«Táýelsizdik alǵannan beri bul ustanym elimizdiń syrtqy saıasatynda erekshe orynda boldy. Osy oraıda álemdik qoǵamdastyqqa Qazaqstannyń barlyq kúsh-jigeri málim, ıaǵnı Semeıdegi ıadrolyq polıgondy jabýdan bastap, Ortalyq Azııada ıadrolyq qarýdan azat aımaq qurý boıynsha qujattarǵa qol qoıýǵa deıingi sharalardyń mańyzdylyǵy zor. Sonymen qatar tómen baıytylǵan ýran bankin qurý qadamdary da aıryqsha nazarda boldy», - dep atap ótti S. Kóshkinbaev.

Onyń sózine qaraǵanda, ıadrolyq qarýdy taratpaý rejımin nyǵaıtý turǵysynda Memleket basshysynyń kúsh-jigeri álemde úlken qoldaýǵa ıe bolyp otyr.

«Jalpy, ıadrolyq qarýdy taratpaý isindegi Qazaqstannyń kóshbasshy rólin AQSh-tyń basshylyǵy tarapynan joǵary baǵalanýda. Sondyqtan da Qazaqstannyń osy bastamalary ózekti bolyp otyr jáne ýaqtyly jasaldy dep paıymdaımyn. Sebebi bul másele jahandyq kúntártipte aıryqsha orynda ekeni málim», - dep atap ótti sarapshy.