XII-shi «Bastaý» kınofestıvaliniń jeńimpazdardy anyqtaldy
Úzdik qysqametrajdy fılm nomınatsııasynda bas syılyqty polshalyq rejısser Domınık Mıretskııdiń «Son of Happiness» kartınasy jeńip aldy. Eń úzdik anımatsııalyq týyndy bolyp ýkraınalyq «Obirých» fılmi atandy. Al derekti fılmder sektsııasynda bas júldeni otandyq «Menin Terminatorsham» kartınasy utty. Sonymen birge qazylar alqasy Slovakııadan kelgen «Kásibı ata-ana» atty týyndyny erekshe atap ótti.
— Kınoda eń qıyny — ony bastaý. Sol sebepti bizdiń basty maqsatymyz osy daryndy jastardyń alǵashqy qadamyna qoldaý kórsetý, damytý, olardy tanytý. Ol úlken jumys. Uıymdastyrý qıynshylyqtaryna, qarajattyń joqtyǵyna qaramastan biz bıyl festıvaldi ózimiz ótkizdik. Búkil seriktester men qoldaýshylarǵa myń alǵys, — dep atap ótti «Bastaý» prezıdenti Sergeı Ázimov.
Dástúrli túrde festıvalde stýdenttik qazylar alqasy da óz tańdaýyn jasady. Jastardyń tańdaýy Polshadan kelgen taǵy bir kartına — Aleksandr Pakýlskııdiń Hi grandpa fılmi. Stýdentter sonymen qatar debıýtant Mahambet Myrzanyń «Qarasha» atty týyndysyn da erekshe atap ótti.
– Bul meniń debıýttik jumysym. Birinshi kýrsta túsirgem. Qazir óner akademııasynda ekinshi kýrsta oqımyn. Bul meniń úshinshi festıvalim. Máskeýde, jáne kúni keshe Túrkııada boldym. Biraq alǵashqy júldemdi Qazaqstanda alyp otyrmyn. Bul men úshin úlken mártebe. Meniń fılmim — aýylda adal eńbekpen ómir súretin ata men áje týraly, — deıdi debıýtant, tanymal tıktoker Mahambet Myrza.
Sonymen qatar, Túrkııanyń «Vaziyet» atty týyndysy NETPAK — Azııa kınosyn ilgeriletý jónindegi dúnıejúzilik uıymnyń júldesin jeńip aldy. Al festıval prezıdentiniń «Jarqyn debıýt» úshin arnaıy júldesimen otandyq rejısser Alına Mustafına «Onyń ákesine, meniń arǵy atama, onyń arǵy atasyna pirándik» derekti fılmi úshin marapattaldy.
Sondaı-aq, saltanatty rásimde rejısserlerge arnalǵan Almaty Film Lab sheberhanasynyń ekinshi pıtchıng jeńimpazdarynyń esimderi belgili boldy. Olar óz jobalaryn odan ári óndirý úshin qarjylyq qoldaý alady. Jeńipmazdardyń qataryna «Aıaýlym» jobasymen Mıra Abdrahmanova jáne «Toıymsyz adamdar» týyndysymen Dastan Túsipbekov qosyldy.
Saltanatty shara byltyrǵy pıtchıng jeńimpazdarynyń úsh qysqametrajdy fılmin kórsetilimimen aıaqtaldy.
Esterińizge sala ketsek, bıyl konkýrstyq baǵdarlamaǵa 500-den astam ótinim kelip tústi, olardyń ishinen 28 eldiń 43 kartınasy irikteldi. Sondaı-aq, festıvaldiń ashylý saltanatynda otandyq kınoındýstrııanyń damýyna qosqan úlesi úshin aqsaqaldarymyz Asanáli Áshimov, Rahman Álshanov jáne Qanat Ábishevke erekshe syılyqtar tabystaldy. Festıvaldi dástúrli túrde Almaty qalasy ákimdiginiń qoldaýymen Tanaris Production jáne A-Team kınokompanııalary uıymdastyrdy.
Eske sala keteıik, «Meniń atym – Qoja» kitaby frantsýz tiline aýdarylyp, Parıjde tanystyryldy.