XI Qazan halyqaralyq musylman kınosy festıvaline qatystyrylatyn týyndylar anyqtaldy

ASTANA. QazAqparat - XI Qazan halyqaralyq musylman kınosy festıvaliniń irikteý komıssııasy óziniń jumysyn aıaqtady, dep habarlanǵan kınofestıval saıtynda.

Reseılik belgili kınotanýshy, kıno synshysy Sergeı Lavrentevtiń tóraǵalyǵymen atalǵan komıssııa ótinim berý aıasynda tirkelgen 700-ge jýyq fılmdi kórip shyǵyp, baıqaýdyń short-paraǵyn aıqyndady. 2015 jylǵy festıvaldiń júldesin ıelený úshin álemniń 25 elinen 50 fılm baq synasatyn boldy. Olardyń ishinde on-onnan tolyq metrajdy, qysqa metrajdy, derekti tolyq metrajdy, derekti qysqa metrajdy jáne anımatsııalyq fılmder bar. Negizgi baıqaý atalymynda mádenı yqpaldastyq taqyrybyna arnalǵan týyndylar qaralady. Onyń ishinde Sadyq Shernııazdyń «Qurmanjan Datqa. Taý patshaıymy» (Qyrǵyzstan), Dervısh Zaımnyń «Balyq» (Túrkııa), Farıd Davletshınniń «Rýdolf Nýrıev. Rýdık» (Reseı), Nosır Saıdovtyń «Ustaz» (Tájikstan), Shahavan Idrestiń «Júzi kúlge malynǵan» (Irak), A.Azgarıdiń «Shekarasyz» (Iran), Bıdjýdyń «Esimderi beımálim» (Úndistan), Mansýr Vasatıdiń «Qudyq» (Ózbekstan), Darıa Poltoratskaıanyń «Moskvabadtan qashý» (Reseı) jáne M.S.Farýkıdiń «Qumyrsqanyń hıkaıasy» (Bangladesh) fılmderi bar.