ASTANA. KAZINFORM — Qazaqstannyń birinshi, álemniń 6-raketkasy Elena Rybakına Er-Rııad qalasynda (Saýd Arabııasy) ótip jatqan WTA qorytyndy týrnırin aıqyn jeńispen bastady.
Álemniń eń úzdik segiz tennısshisi qatysatyn aıtýly jarysta qazaqstandyq tennısshi Serena Ýılıams tobynda alǵashqy matchyn álemniń 4-raketkasy, amerıkalyq Amanda Anısımovamen ótkizdi.
Rybakına básekeni sátti bastady – 2:0. Sodan soń setti taǵy bir breıkpen támamdady – 6:3.
Ekinshi partııada Elena 3:0 esebimen alǵa ketti. Taǵy bir breık – 5:1. Aqyry matchty jeńispen túıindedi – 6:1.
Nebári 57 mınýtqa sozylǵan básekede Rybakına 7 eıspen birge 5 breık-poınttyń tórteýin múlt jibergen joq. Anısımova 2 eıspen shekteldi.
Qazaqstandyq sportshymen bir topta óner kórsetetin álemniń 2-raketkasy, Polsha ókili Iga Shventek bastapqy oıynynda reıtıngide 7-oryndaǵy amerıkalyq Medıson Kızdi oısyrata jeńdi – 6:1, 6:2.
Rybakına kelesi kezdesýin 3 qarasha kúni Shventekpen ótkizedi.
Eske sala keteıik, budan buryn Elena Rybakına jyldyń qorytyndy týrnırin uta ala ma, sol týraly jazǵan bolatynbyz.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).