«Worldskills Turkestan 2020» chempıonaty bastaldy

TÚRKІSTAN. QazAqparat – Túrkistan oblysynda tehnıkalyq jáne kásiptik bilimdi damytýǵa baǵyttalǵan «Worldskills Turkestan 2020» chempıonaty bastaldy. Óńirlik irikteý baıqaýynda 319 stýdent 46 mamandyq boıynsha baq synaıdy, dep habarlaıdy QazAqparat tilshisi.

Birneshe mamandyq boıynsha baıqaýǵa qatysqan stýdentterdiń chempıonaty 10 kúnge jalǵasady. Saıysta jastardyń tájirıbelik daıyndyǵy men kásiptik biliktiligi shyńdalyp, shyǵarmashylyǵy men joǵary eńbek mádenıeti qalyptasady. Sondaı-aq, zamanaýı, onyń ishinde aqparattyq-kommýnıkatsııalyq tehnologııany is júzinde qoldana alý biliktilgi synalady.

Baıqaýdyń bıylǵy ereksheligi, Túrkistandaǵy mańyzdy qurylys salasyna meılinshe nazar aýdarylyp otyr. Saıys jeńimpazdaryna ulttyq chempıonatqa joldama beriledi dep josparlanǵan. Sondaı-aq, arnaıy syılyqtar qarastyrylǵan.

Aıta keteıik, jastar atalǵan chempıonatqa 2015 jyldan bastap qatysyp keledi. Sol jyldar ishinde qol jetkizgen jetistik az emes. Máselen, byltyr Nur-Sultan qalasynda ótken «WorldSkills Kazakhstan - 2019» V respýblıkalyq chempıonatyna oblystan 33 stýdent qatysqan bolatyn. Onyń ishinde 17 daryndy jas 4 altyn, 2 kúmis, 2 qola, 9 medalon jeńip alǵan edi. Jalpy komandalyq esepte oblystyń stýdentteri úshinshi oryndy ıelengen bolatyn.