Worldometers málimeti: Álemde koronavırýs indetinen 6 098 227 adam qaıtys bolǵan

NUR-SULTAN. QazAqparat - Worldometers-tiń únemi jańartylyp otyratyn baqylaý paraǵy 2022 jylǵy 20 naýryzdaǵy jaǵdaı boıynsha álemde COVID-19 koronavırýs aýrýynan 6098227 adamnyń qaıtys bolǵan (táýligine+3827). Al 470 mıllıonnan astam adam vırýs juqtyrǵan.

Bul týraly QazAqparat QR Úkimeti janyndaǵy Qazaqstanda koronavırýstyń taralýyna jol bermeý jónindegi vedomstvoaralyq komıssııasynyń Telegram kanalyna silteme jasap habarlaıdy.

Qazirgi ýaqytta 64 mıllıonǵa jýyq adamnan vırýs anyqtaldy, 400 mıllıonnan astam aýrýdan saýyqty. Ólim-jitimniń ortasha kórsetkishi 1,3%.

Germanııa federaldy deńgeıde koronavırýsqa qarsy shekteýlerdiń kópshiligin alyp tastady. Alaıda, aımaqtyq deńgeıde shekteýler óz kúshinde qalýy múmkin. 20 naýryzdan bastap Deutsche Bahn poıyzdarynda «3G erejesi» alynyp tastalady, oǵan sáıkes tek vaktsınatsııalanǵan, aýyrǵan nemese koronavırýsqa synaq jasaǵannan keıin teris nátıje anyqtalǵan adamdarǵa júrýge ruqsat etildi.

«Sonymen qatar, jumys ornynda «3G erejesin» saqtaý qajet emes. Bolashaqta kásiporyndar táýekelderdi óz betinshe baǵalap, qajet bolǵan jaǵdaıda pandemııadan qorǵaý sharalaryn qabyldaýy kerek»,-delingen habarlamada.