World dog show-2023: Qazaqstannyń jas hendlerleri Shveıtsarııada synǵa túsedi

JENEVA. QazAqparat – Qazaqstan kınologteriniń delegatsııasy tazy ıtterimen alǵash ret Halyqaralyq kınologııalyq federatsııa (FCI) qamqorlyǵymen Shveıtsarııada ótip jatqan saıystar serııasyna qatysady, dep habarlaıdy «QazAqparat» menshikti tilshisi.

Mıkroavtobýspen 12 eldiń shekarasynan ótip, 8 myń shaqyrymǵa jýyq jer júrgen qazaqstandyq komanda Jenevaǵa jetti. Erteń, 27 tamyz kúni olar kınologter úshin jyldyń basty oqıǵasy sanalatyn «World dog show-2023» álem chempıonatyna qatysady.

Aıta ketsek, bıyl Halyqaralyq kınologııalyq federatsııa (FCI) birneshe kúnge sozylatyn saıystar aıasynda ıýnıor hendlıngi boıynsha baıqaý uıymdastyryp otyr. Oǵan jınalǵan 100 qatysýshynyń arasynda Qazaqstannyń eki ókili de bar. Olar – Tumar esimdi tazysyn alyp kelgen 13 jasar Valerııa Vasılchenko (Astana) jáne Vangelııa esimdi labrador ertken 14 jasar Sofııa Kapýstına (Almaty).

Qazaqstan kınologteri odaǵynan málim etkenindeı, eki qyz da buǵan deıin ulttyq jáne halyqaralyq ıtter kórmesine qatysyp, júldeli bolǵan. Al, «Tumar» tazy (4 jasar) men «Vangelııa» labrador (9 jasar) «Shveıtsarııa Gran-prıinde» óz sanattarynda CAC tıtýlyn alǵan. Endi kórmeniń basty – «Jenevadaǵy Álem kýbogy 2023 chempıony» jáne «Jenevadaǵy Álem kýbogy 2023 ardagerler arasyndaǵy chempıon» ataqtaryn jeńip alýǵa múmkindik bar.

Sofııa Kapýstına álemniń 32 jas hendleri arasynda úshtiktegi oryn úshin talasady. Valerııa Vasılchenkonyń aqtyq saıysqa shyǵýǵa múmkindigi mol.

Uıymdastyrýshylar málimetinshe, «World dog show-2023» saıysyna álemniń birneshe elinen 20 myń ıtti qatystyrýǵa ótinim túsken. Barlyǵy 200 tuqymdy ıtti 150 halyqaralyq tóreshiler baǵalaıdy.