Wildberries daýly oqıǵasy Qazaqstan naryǵyna qalaı áser etedi

<p>ASTANA. KAZINFORM — Wildberries Astanada jańa logıstıkalyq ortalyqtyń qurylysyn jalǵastyrýda. Qoımanyń aýdany 160 myń sharshy metrden asady, qazir qurylys aýmaǵynda topyraq tegistelip, baǵanalar qaǵylyp jatyr. Sońǵy oqıǵalarǵa baılanysty kompanııa Qazaqstan naryǵynda qalaı jumys isteıdi jáne taýarlardyń keshigýi múmkin be — bul suraqtarǵa Wildberries Russ baspasóz qyzmeti jaýap berdi. </p>

Buǵan deıin Máskeý ortalyǵyndaǵy Wildberries keńsesiniń janynda atys bolyp, birneshe adam ustalǵan edi.

Wildberries-tiń negizin qalaýshy Tatıana Bakalchýk muny Vladıslav Bakalchýk, Sergeı Anýfrıev jáne Vladımır Bakınniń jetekshiligimen uıymdastyrylǵan sátsiz reıderlik basyp alý áreketi dep baǵalady. 

Kompanııanyń habarlaýynsha, qazaqstandyq satyp alýshylar barlyq taýardy úırenshikti merzimde alyp keledi.

Al jańa logıstıkalyq ortalyqtar arqyly Qazaqstanda taýarlardy jetkizý ýaqyty qysqarady — eger taýar jergilikti qoımada bolsa, ol shalǵaıdaǵy logıstıkalyq ortalyqtardan emes, sol jerden jóneltiledi. 

«Jergilikti kásipkerler saıtta óz assortımentin edáýir keńeıtip, ony kompanııanyń barlyq elderinde sata alady. Elde úlken logıstıkalyq ortalyqtyń bolýy kásipkerlerge logıstıkalyq shyǵyndardy azaıtýǵa múmkindik beredi — olar barlyq jetkizilimdi basqa elder men aımaqtarǵa emes, tikeleı qoımaǵa jasaı alady. Sonymen birge, Wildberries pen Russ birigýi marketpleıske qosymsha jarnamalyq quraldar beredi, bul marketpleıstiń ózin de, onyń seriktesterin de edáýir keńeıtedi», — dep jazylǵan kompanııa jaýabynda.

Aıta keteıik, maýsym aıynyń ortasyna taman Wildberries marketpleısi men syrtqy jarnama operatory Russ kompanııasy jańa tsıfrlyq saýda platformasyn qurý úshin birigetin bolyp sheshken.

Vladıslav Bakalchýk buǵan qarsy bolǵan. Ol «Vaıldberıs» ashyq aktsıonerlik qoǵamy aktsııalarynyń 1% ıe. Qalǵan 99% kompanııanyń negizin qalaýshy, onyń áıeli Tatıana Bakalchýktyń ıeliginde edi.

Wildberries pen Russ-tyń baspasóz qyzmeti birlesken kompanııanyń osy oqıǵalar kezinde de turaqty jumys istep jatqanyn jáne ózderiniń mindetterin tolyq atqaratynyn habarlaǵan.

Tatıana Bakalchýk 30 shilde kúni Vladıslav Bakalchýkpen ajyrasý jóninde sotqa aryz bergen.