WBC prezıdenti Golovkın - Alvares aıqasyna qatysty pikirin bildirdi

ASTANA. QazAqparat - Búkilálemdik boks keńesiniń (WBC) prezıdenti Maýrısıo Sýleıman Gennadıı Golovkın (37-0, 33 KO) men Saýl Alvares (49-1-1, 34 KO) arasynda ótetin jekpe-jekke qatysty pikirin bildirdi, dep habarlaıdy Sports.kz.

«Bul tamasha boksshylar juby. Bul aıqasta tájirıbe men jastyq, kúsh pen jyldamdyq beldesedi. Eki boksshy da bul jekpe-jekke ózderiniń eń jaqsy daıyndyǵymen keledi. Olardyń bokstasý stıli bizge uly da tamasha aıqas syılaıtynyna seneıik. Bul jekpe-jekke bútin álem kóz tigip otyr, óıtkeni ol tarıhı aıqas bolmaq», - deıdi Sýleıman.

Eske salaıyq, 16 qyrkúıekte Gennadıı Golovkın meksıkalyq boksshy Saýl Alvarespen judyryqtasady. Osy jekpe-jekte Alvares GGG-diń tek eki ataǵy - WBA men IBF belbeýleri úshin ǵana talasady. Golovkın utylyp qalsa, onyń taǵy eki belbeýi - WBC men IBO bos qalyp, ony basqa boksshylar ózara sarapqa salady. Al qazaqstandyq boksshy jeńiske jetse, tórt belbeýine taǵy The Ring jýrnalynyń arnaıy belbeýin qosyp alady. Atalǵan basylym ony arnaıy Alvares úshin shyǵarǵan bolatyn.

Ýaqyt aıyrmashylyǵyna baılanysty Qazaqstanda jekpe-jektiń tikeleı kórsetilimi 17 qyrkúıek kúni tańerteń kórsetiledi.