WBC prezıdenti Gennadıı Golovkınniń qalaı ózgergenine tańǵaldy

ASTANA. QazAqparat - Búkilálemdik boks keńesiniń (WBC) basshysy Maýrısıo Súleıman sońǵy ýaqytta orta salmaqtaǵy WBC/WBA/IBO álem chempıony Gennadıı Golovkınniń óz qarsylasy, meksıkalyq Saýl «Kanelo» Alvareske qatysty ótkir pikirler aıtyp, minez-qulqy aıtarlyqtaı ózgere bastaǵanyn atap ótti, dep jazady Sports.kz.

GGG men «Kanelonyń» qarym-qatynasy meksıkalyqtyń klenbýterolǵa dopıng-synamasy eki ret oń nátıje bergennen soń birden nasharlap, mamyrdaǵy jekpe-jegi keıinge shegerilgen bolatyn.

«Biz jańa kezeńde, jańa Golovkınmen tanysyp jatyrmyz. Sońǵy jyldar oǵan aýyr tıdi. «Kanelomen» rematch týraly kelissózder de qıynǵa soqty, sebebi ol ózin keıingi josparǵa ysyrylǵandaı sezindi. Onyń málimdemesi «Kaneloǵa» jetip, bul oǵan rematchta yqpal etýi múmkin. Biz bul týraly jekpe-jek kúni biletin bolamyz. Olardyń (Alvarestiń komandasy) dopıngke qatysty problemasy boldy, ol kezde Golovkın onyń ne ekenin bilgen joq edi. Bul onyń ashýyn týǵyzdy», - dedi Súleıman Boxingscene.com-ǵa bergen suhbatynda.