Volonterlikti damytýda memorgandarǵa birqatar mindet júkteý qajet - Aıda Balaeva

NUR-SULTAN. QazAqparat – Volonterlik qyzmetti qarqyndy damytý úshin memlekettik organdarǵa birqatar mindet júkteý qajet. Bul týraly Úkimet otyrysynda QR Aqparat jáne qoǵamdyq damý mınıstri Aıda Balaeva aıtty, dep habarlaıdy QazAqparat tilshisi.

«Volonterlikti damytý isinde basty nátıje memlekettik organdarǵa tikeleı baılanysty. Árıne, volonterlik aqy tólenbeıtin erikti qyzmet. Dese de, ol jaǵdaı jasaýdy, janashyrlyqpen qaraýdy talap etedi. Volonterlik qozǵalystyń qarqyndy damýy búgingi azamattyq bastamalarǵa laıyqty deńgeıde qoldaý kórsetýge baılanysty. Osyǵan baılanysty memlekettik organdarǵa birqatar mindetti júkteý oryndy sanaımyn. Birinshi - volonterlik barlyq salany qamtıtyn ámbebap qyzmet. Sondyqtan 2021-2023 jyldarǵa arnalǵan jol kartasynyń aıasynan memlekettik organdar tys qalmaýy tıis», - dedi ol.

Ekinshiden, mınıstr úzdik volonterlik tájirıbelerdi saýatty túrde nasıhattap, aqparattyq túsindirý jumystaryn kúsheıtý qajettigin aıtty.

«Úshinshi, jergilikti atqarýshy organdarǵa volonterlik jobalardy qarjylandyrýdy ulǵaıtý jáne volonterlik bastamalardy qoldaý múmkindikterin keńeıtý kerek. Tórtinshi, volonterler kóteretin suraqtar negizinen áleýmettik mańyzy zor máseleler. Bul oraıda jergilikti organdar tarapynan turaqty monıtorıng jasalyp, olardy ýaqytyly sheshý tetikterin qarastyrý qajet. Besinshi, «Igi ister» marafony respýblıkalyq aktsııasyna kásipkerler jáne uıymdarmen birge qarapaıym azamattardy da keńinen tartý qajet. Sebebi marafonnyń maqsaty tek demeýshilerdi tartyp, qaıyrymdylyq jasaý ǵana emes, kúndelikti jaqsy ister arqyly jany jomart, rýhy kemel qoǵam qalyptastyrý», - dedi Aıda Balaeva.