Volonterlik týraly zańnyń oryndalýyna monıtorıng júrgiziledi

NUR-SULTAN. QazAqparat – Qazaqstanda bıyl qyrkúıekte kúshine enetin volonterlik qyzmet týraly zańnyń oryndalý protsesin anyqtaýda monıtorıng júrgizilmek. Bul týraly Parlament Senatynyń tóraǵasy Máýlen Áshimbaev málim etti, dep habarlaıdy QazAqparat tilshisi.

«Parlament Senaty tarapynan biz elimizde volonterlikti odan ári damytýǵa baılanysty máselelerdi erekshe baqylaýda ustaýdy jalǵastyramyz. Bul baǵytta quzyrly memlekettik organdarmen birlesip jumys isteıtin bolamyz. Volonterlik týraly zańnamanyń, onyń ishinde bizdiń óńirlerde is júzinde iske asyrylýyna monıtorıng júrgizý mańyzdy. Qajet bolǵan jaǵdaıda zańnamalyq bazany jetildiremiz», - dedi Máýlen Áshimbaev elordada ótip jatqan Ortalyq Azııa volonterler forýmy barysynda.

Sondaı-aq, Senat basshysy Ortalyq Azııa memleketteriniń basshylary óńirlik yntymaqtastyqty damytý jónindegi jol kartasyn maquldaǵanyn eske saldy.

Sonyń aıasynda Ortalyq Azııa elderiniń parlamentaralyq forýmyn qurýdy kózdeıdi.

«Ortalyq Azııa elderiniń Parlamentaralyq forýmyn qurý týraly bastama elderimizdiń parlamentshileri arasyndaǵy yntymaqtastyqty nyǵaıtýǵa yqpal etetinine senimdimin. Óńirlik kooperatsııa men jan-jaqty yntymaqtastyqtaǵy Ortalyq Azııanyń bolashaǵy. Óńirlik baılanystardy nyǵaıtý jáne damytý úshin barlyǵymyzǵa ár túrli deńgeıde kúsh salý mańyzdy», - deıdi ol.

Buǵan deıin habarlaǵanymyzdaı elimizde sońǵy úsh jyldyń ishinde volonterlerdiń sany 4 ese, al volonterlik uıymdar 3 ese artqan.

Aıta keteıik, búgin Nur-Sultanda Ortalyq Azııa elderi volonterleriniń forýmy ótip jatyr .