Volonterlerge qandaı qoldaý sharalary kórsetiledi
Onyń aıtýynsha, elde volonterlik qyzmetke qatysyp júrgen azamattar men uıymdar qatary artyp, baǵdarlamalar men jobalar aýqymy aıtarlyqtaı keńeıe tústi.
«Sońǵy úsh jyldyń ózinde volonterlik uıymdar sany 3 esege artty. Máselen, 2019 jyly – 224 bolsa, 2023 jyly – 680-ge jaqyndap qaldy. Belsendi volonterler qatary 4 esege kóbeıdi, 2019 jyly – 50 myń adam bolsa, 2023 jyly – 200 myńnan asqan. Elimizde zańnamalyq deńgeıde volonterlerdi qoldaý sharalary engizildi. Onyń aıasynda, oqýǵa tapsyrý men jumysqa ornalasý kezinde jeńildikter qarastyrý, volonterlik uıymdarǵa memlekettik múlikti aqysyz negizde jalǵa berý qarastyrylǵan», - dedi Danııar Qadyrov Ortalyq kommýnıkatsııalar qyzmetindegi baspasóz máslıhatynda.
Volonterlik ınfraqurylymdy damytý baǵytynda eriktilerdiń respýblıkalyq jáne 20 óńirlik front-ofısteri óz jumysyn jalǵastyrýda. Olar jyl saıyn 113 myńnan astam volonterdiń qatysýymen 6 myńnan astam shara ótkizedi.
«Mınıstrlik halyqaralyq volonterlikti damytý salasynda birqatar jumys júrgizýde. Úkimettiń tikeleı qoldaýymen 7 qazaqstandyq volonter BUU Eriktiler baǵdarlamasynda jumys atqarýda. Mundaı múmkindik álem boıynsha 16 memlekettiń volonterlerine ǵana qoljetimdi. Qazaqstan Ortalyq Azııa elderi ishinde mundaı tájirıbeni qoldanǵan alǵashqy el boldy», - dep atap ótti spıker.