Volonterlerdi daıarlaýǵa erekshe nazar aýdaryp otyrmyz - Dınara Sádýaqasova
«Jas Ulan» biryńǵaı balalar men jasóspirimder uıymy ulttyq jáne jalpy adamzattyq qundylyqtarǵa sáıkes rýhanı dúnıesi keń tulǵany qalyptastyrý, balalar men jasóspirimderdi qazaqstandyq patrıotızm rýhynda tárbıeleýmen aınalasady. Balalardy jan-jaqty damytyp, olardyń kóshbasshylyq qabiletterin ashýǵa kómektesedi. Sonymen qatar, balalardyń halyqaralyq jobalarǵa, baıqaýlarǵa, is-saparlarǵa qatysýyna múmkindik beredi. 1 maýsym- Halyqaralyq balalardy qorǵaý kúni elimizdegi eń mańyzdy merekelerdiń biri. «Jas Ulan» biryńǵaı balalar men jasóspirimder uıymy balalarmen tyǵyz jumys istegendikten, bul biz úshin aıryqsha meıram. Balalardy osyndaı tamasha merekemen quttyqtap, baqytty balalyq shaq tileımiz!», - dep toqtaldy D. Sádýaqasova.
Osy oraıda ol «Jas Ulan» biryńǵaı balalar men jasóspirimder uıymy jyl saıyn saıabaqtarda balalarǵa arnalǵan túrli kóńil kóteretin is-sharalar uıymdastyratynyn eske saldy.
«Bıyl elimizdegi karantındik sharalarǵa baılanysty balalardy onlaın túrde quttyqtap jatyrmyz. Mereke qarsańyńda «Jas Ulan» biryńǵaı balalar men jasóspirimder uıymyna qabyldaý saltanaty onlaın túrde ótip jatyr. Nur-Sultan qalasynyń 2000 oqýshysy uıym qataryna qosyldy. Balalardyń damýyna qatysty «Oqýshylardy psıhologııalyq saýyqtyrý klýby» jobasy, «Jas Ulannan keńes» chellendji, Abaı Qunanbaıulynyń 175 jyldyǵyna qatysty vıktorına, «Álemdik mura» chellendji sııaqty is-sharalar onlaın túrde ótkizildi. Aldaǵy ýaqytta Abaı ánderi boıynsha kaverler baıqaýyn jarııalaımyz», - dedi uıym tóraıymy.
Onyń aıtýynsha, Jeńistiń 75 jyldyǵyna arnalǵan birqatar is-sharalar júzege asyryldy, ınstagram jelisinde vıktorına ótkizý josparlanyp otyr. «Jas Ulan» uıymynyń janynan qurylǵan «Jas Ulan Team» oqýshylardan qurylǵan volonterler toby Ekinshi dúnıejúzilik soǵys kezinde is-tússiz joǵalyp ketken soldattardy izdestirýmen aınalysady.
«Barlyq mektepterde «Rýhanı jańǵyrý» baǵdarlamasy aıasynda jas urpaqtyń boıynda otbasy qundylyqtaryn qalyptastyrý men damytýǵa baǵyttalǵan «Órkendeý» jobasy iske asyrylyp jatyr. Sonymen qatar, balalardyń tarıhı-mádenı muralarǵa, ekologııaǵa degen qyzyǵýshylyǵyn arttyrý maqsatynda «Birgemiz: Taza Alem», «Birgemiz: Asyl Mura» jalpyulttyq jobalaryn júzege asyryp jatyrmyz. 19 mamyrdan bastap jobalarǵa volonterler irikteýdi bastadyq. Tarıhı-mádenı muraǵa, ekologııaǵa qyzyǵýshylyǵy bar 2 000 volonter iriktelip, arnaıy oqytylady. Ótinim 2020 jyldyń 7 maýsymyna deıin qabyldanady. Oqýdy sátti aıaqtaǵan barlyq volonter «Birgemiz: Asyl Mura», «Birgemiz: Taza Alem» jalpyulttyq jobalarynyń volonterler qataryna qabyldanǵanyn rastaıtyn sertıfıkat alady.Úzdik volonterler 2020 jyldyń qarasha aıynda Taraz qalasynda ótetin qorytyndy merekelik sharaǵa qatysýǵa shaqyrylady. Eń úzdik volonterlerdiń jetistikteri men tájirıbeleri Qazaqstannyń barlyq óńirlerine taratylatyn Úzdik tájirıbeler jınaǵyna kiredi», - dep túsindirdi Dınara Sádýaqasova.
Oneyń atap ótýinshe, týrızm baǵytyndaǵy gıd volonterlermen tarıhı-mádenı jerlerde ekskýrsııa jumystary júrgiziledi.Tarıhı-mádenı nysandar jaıly aqparattardy kóbeıtý maqsatynda volonterler arasynda wikipedia-ny tolyqtyrý boıynsha «Asyl mura» baıqaýy, tarıhı-mádenı jerlerge qatysty beınerolıkter baıqaýy uıymdastyrylady. Sondaı-aq «Birgemiz: Taza Alem» jalpyulttyq jobasy aıasynda ploggıngter, janýarlar úıine baryp kómek kórsetý, qustar uıashyǵy festıvali, birdeı is-áreketter kúni, «EcoCamp» lageri,EkoLife Challenge, «Eco Alem» ústel oıyny, darmarka, bıopaket óńdiretin zaýyttarǵa ekskýrsııa júrgizý, «Men Eko-Volonter» baıqaýy uıymdastyrylady.
«2020 jyldyń 25 mamyrynda «Jas Ulan» uıymy Jeńistiń 75 jyldyǵyna oraı «Birgemiz: Taza Alem» jalpyulttyq jobasy aıasynda Botanıkalyq baq aýmaǵynda 75 aǵash otyrǵyzdy. Sondaı-aq aktsııa onlaın túrde de iske asyrylyp jatyr. Aktsııaǵa qatysý úshin ár adam úıiniń janyna gúl nemese aǵash otyrǵyzyp, ony batyr babalarymyzǵa arnaıdy. Aktsııaǵa Qazaqstan boıynsha oqýshylar belsendi atsalysyp jatyr», - dedi uıym tóraıymy.