«Volonter» jyly aıasynda «Іzgi amal» syılyǵy tabystaldy
Atalǵan syılyq QR Mádenıet jáne sport mınıstrliginiń qoldaýymen «Qazaqkontsert» uıymy jáne «Habar» agenttiginiń birlesken «Ulystyń uly kúni» jobasy aıasynda tabystaldy. Búgingi is-shara «Qazaqstan» ortalyq kontsert zalynda kórermendersiz ótse de, bul joba mereke kúnderi «Habar» agenttiginiń arnalarynan tamashalaýǵa usynylady.
«Qazaqkontsert» uıymynyń dırektory Jeńis Seıdollauly atap ótkendeı, ótken jyldan bastaý alǵan «Ulystyń uly kúni» áleýmettik kontserttik jobasy kórermen qaýymnyń súıispenshiligine bólenip, bıyl da óziniń jalǵasyn tapty.
«Byltyr joba aıasynda áleýmettik turǵydan osal jandarǵa qaıyrymdylyq maqsatta kontsertke tegin bıletter tabystalyp, syılyqtar berildi. Al osy jylǵy «Ulystyń uly kúni» jobasynyń basty jańalyǵy – «Іzgi amal» syılyǵynyń berilýi. Bul syılyqtardy belgili artıster qaıyrymdylyq jobalarymen aınalysatyn eriktilerge tabystady. Basqasha aıtqanda, óner juldyzdary ıgi isterimen tanylǵan naǵyz juldyzdarǵa osyndaı marapattardy syılady. 2020 jyl «Volonter» jyly dep jarııalanýyna baılanysty, bul syılyqtyń tabystalýy asa ózekti dep bilemin. Osy arqyly eriktilerdiń eren eńbegi elenip, úlken maqsattarǵa umtylýǵa serpin berildi», - dedi uıym dırektory.
Marapatqa ıe bolǵandardyń qatarynda: «Danalyq» otbasylyq qundylyqtar ınstıtýty; «Biz birgemiz» aktsııasyn bastaǵan Tursynbek Qabatov; «Meıirimdiler klýby» eriktiler uıymy; múmkindigi shekteýli balalarǵa arnalǵan beıimdeý sport túrlerin tegin úıretetin «Jas jaýynger» ortalyǵynyń basshysy Sadyq Baıymbetov; qaıyrymdylyq jobalardy júzege asyryp júrgen blogerler Batyrjan Ibragım, Dáýlet Tóleýtaıuly jáne kópshilikke belgili «Hareket» qaıyrymdylyq qory bar.
«Ulystyń uly kúni» - bul amal merekesine jáne Naýryz meıramyna oraı túsirilip jatqan joba bolǵandyqtan, jýyrda «Habar» telearnasynan kórsetiledi. Osy joba arqyly kórermender Naýryzda halqymyzdyń tarıhı jáne ulttyq dástúrlerine qatysty úlken qoıylym negizinde túsirilgen keremet shoýdy tamashalaı alady. Biz osy joba arqyly Naýryzdyń tálim-tárbıelik sıpatyn kórsetip, halyqqa, ásirese, jas býynǵa ónegesi mol týyndy usynamyz. Osyndaı ıgi jobalar aldaǵy ýaqytta da jalǵasyn tabady dep oılaımyn», - dedi «Habar» Agenttigi» AQ basqarma tóraǵasynyń birinshi orynbasary Rınat Kertaev.
«Ulystyń uly kúni» televızııalyq jobasy – barsha óner súıer qaýymǵa mýzykalyq mádenıetimizdiń ozyq úlgilerin pash etetin úlken kontsert. Kontserttik baǵdarlamaǵa kórermen súıip tyńdaıtyn halyq ánderi men zamanaýı tanymal ánder engen. Sahnada Qazaqkontserttiń belgili artısteri men qazaq estradasynyń belgili óner juldyzdary óner kórsetedi. Olardyń qatarynda: «Dos-Muqasan», Altynbek Qorazbaev, Roza Rymbaeva, Jeńis Seıdollauly, Svetlana Aıtbaeva, Tamara Asar, Qaraqat Ábildına, Altynaı Jorabaeva, Móldir Áýelbekova jáne taǵy basqa óner juldyzdary men mýzykalyq toptar bar. Buǵan qosa, kontsertte óz ónerin «Astana sazy» etno-folklorlyq ansambli jáne «Saz&soul» vokaldyq-aspaptyq toby, «Astana mıýzıkl» teatrynyń ártisteri usynady.
COVID19 vırýsynyń taralýynyń aldyn alý maqsatynda merekelik kúnderi kóptegen is-sharalar ótkizilmeıtini jáne qoǵamdyq oryndarda saqtyq sharalary kúsheıtilgeni málim. Osyǵan baılanysty, kontserttik joba aıasynda otandyq estrada juldyzdary bos ýaqytty qalaı tıimdi ótkizý jóninde kórermenderge óz keńesterin jetkizdi. Otandyq ártister atap ótkendeı, qazaqstandyqtar osy múmkindikti barynsha paıdalanyp, bos ýaqyttaryn rýhanı damý, qosymsha bilim alý, tulǵalyq ósý baǵytynda jumsaǵany abzal.