Volonter jyly aıasynda 7 jalpy ulttyq joba júzege asyrylady
«Búginde respýblıka boıynsha 200-den astam volonterlik uıymy jumys isteıdi. Volonterlik qozǵalyspen 50 myńnan astam adam qamtyldy. Ózderińiz biletindeı, Prezıdentimiz Qasym-Jomart Toqaev kelesi jyldy «Volonter jyly» dep jarııalady. Іs júzinde, ol Jastar jylynyń qısyndy jalǵasy bolady jáne ol qoǵamnyń resýrstary men jasampaz energııasyna súıenetin Jastar bastamalaryn da damytýǵa baǵyttalatyn bolady», - dedi ol.
Osyǵan oraı mınıstrdiń aıtýynsha, eń aldymen normatıvtik-quqyqtyq bazany jetildirý qolǵa alynady.
«Qazir biz volonterdiń jumys tájirıbesin eńbek ótiline qosý jáne joǵary oqý oryndaryna, kolledjderge túsý kezinde volonterlik qyzmetti esepke alý múmkindigin qarastyramyz», - dedi D.Abaev.
Ekinshiden onyń sózine qaraǵanda, barlyq óńirlerde «Birgemiz» jalpy tujyrymdamasynyń negizinde 7 jalpyulttyq joba aıasynda Volonterlik qyzmetti qoldaý ortalyqtary qurylatyn bolady.
«Bul jerde qandaı jobalar boıynsha sóz bolyp otyr? Mysaly, «Bilim» jobasy boıynsha aýyldyq mektepterdiń joǵary synyp oqýshylaryna UBT-ǵa daıyndyq, aǵylshyn tili men kompıýterlik saýattylyqqa oqytý boıynsha volonterlik kómek uıymdastyrylady. «Sabaqtastyq» jobasy boıynsha volonterler balalar úıleriniń balalaryna qamqorlyq jasaıdy. Sonymen qatar medıtsınalyq «Saýlyq», qorshaǵan ortany qorǵaýǵa baǵyttalǵan «Taza álem», bul volonterlerdi materıaldyq jáne rýhanı mádenı-tarıhı murany saqtaýǵa tartýǵa baǵyttalǵan «Asyl mura», qarttar úılerindegi jumysqa baǵyttalǵan «Qamqor» jáne volonterlerdi habar-osharsyz ketkenderdi izdeýge tartýǵa baǵyttalǵan «Úmit» jobasy júzege asyrylady», - dedi D.Abaev..
Onyń aıtýynsha, atalǵan jobalarǵa shaǵyn granttar bólý kózdelgen. »Úshinshiden, atalǵan jobalar boıynsha naqty jergilikti mindetterdi sheshýge baǵyttalatyn 300 myń teńgege deıin shaǵyn granttar bólý kózdeledi. Barlyǵy 420-ǵa jýyq shaǵyn grantqa qoldaý kórsetiledi. Tórtinshiden, korporatıvtik volonterlikti odan ári damytý úshin bıznes-sektordy belsendi tartý josparlanýda. Búkil álemde bul fenomen meınstrımge aınalǵan. Bizdiń elde volontrliktiń mundaı túri ázirge óte tanymal emes, biraq atap ótýge laıyqty jekelegen mysaldar bar», - dedi ol.
Osy oraıda Dáýren Abaev Bi-group qurylys kompanııasy múgedek balalardy áleýmettendirý boıynsha jumys júrgizip, túrli festıvaldar, sporttyq marafondar uıymdastyratyndyǵyn, kúrdeli medıtsınalyq operatsııalardy ótkizýge materıaldyq kómek kórsetetindigin, aýyl oqýshylary arasynda olımpıadalar ótkizetindigin mysalǵa keltirdi.
«Volontrlik qyzmet salasynda, onyń ishinde BUU volonterler baǵdarlamasyn qosa alǵanda, ınternatsıonaldyq qurylymdardyń jumysyna belsendi qatysý jolymen halyqaralyq yntymaqtastyq damıtyn bolady. Ózderińiz bilesizder, kelesi jyly Jeńis kúni toılanady. Sonyń aıasynda reseılik tarappen de birge jobalardy úzege asyrýǵa bolady», - dedi Dáýren Abaev.