Volonter: Іndetpen búkil el kúresip jatqanda úıimde qur qol otyra almadym

NUR-SULTAN. QazAqparat – Elordada volonterlerdi jınap jatqan kezde erikti túrde dárigerlerge kómektesýdi jón dep sheshkenderdiń biri – Shynar Oral. Jumysynan bosap qalǵan ol óz ýaqytyn elge paıdaly bolatyndaı jumsaýym kerek deıdi.

Shynar Oral elordadaǵy emhana retinde jasaqtalǵan «Ramada» qonaq úıinde volonter bolyp júr. Medıtsınalyq qyzmetkerlermen birge táýlik boıy koronavırýs juqtyrǵan azamattarmen baılanysta bolǵandarǵa qyzmet kórsetedi.

«Tótenshe jaǵdaıǵa baılanysty jumysym toqtap qaldy. Úkimetten 42 500 teńgelik járdemaqy aldym. Biraq nelikten men úıde qur qol otyrýym kerek dep oıladym. Halyqqa, memleketke paıdam tısin dep, dárigerlerge kómekke keldim. Prezıdenttiń bıylǵy jyldy Volonterler jyly dep jarııalanǵanyn bilemin. Alaıda óz jumysymda júrgen kezimde volonter bolý degenniń qandaı bolatynyn túsine bermeıtinmin. Ońaı emes, álbette. Biraq jumys istep jatyrmyz», -deıdi ol.

Shynar Oral osynaý qıyn kezeńde medıtsına qyzmetkerlerine túsinistikpen qaraýdy suraıdy. Aıtýynsha munda balalaryn aptalap kórmeı ketken aq halatty abzal jandar bar. Olardyń qalypty ómirge qaıtyp kelýi – qazirgi eldiń karantın rejımin saqtaýyna tikeleı baılanysty bolyp otyr.

Eske sala ketsek búgin QR Prezıdenti Teleradıokesheni «Karantın aýmaǵy. Volonterler» atty shaǵym fılmdi jarııalaǵan bolatyn. Shaǵyn fılmde koronavırýs juqtyrǵan azamattarmen baılanysta bolǵandardy qabyldap, oqshaýlaıtyn emhana sıpatynda jasaqtalǵan «Ramada» qonaq úıindegi eksklıýzıvti kadrlar beınelengen.

Medıtsınalyq qyzmetkerlermen birge júzdegen volonter táýlik boıy oqshaýlanǵan azamattardy baqylap, olarǵa qyzmet kórsetip keledi. Volonterler emhanada jabyq rejımde ómir súredi. Qonaq úı aýmaǵynan tek medıtsınalyq qyzmetkerlermen birge kete alady.