Volokolamsk pen Qapshaǵaı baýyrlas qala atandy (FOTO)

MÁSKEÝ. QazAqparat - Jeńistiń 70 jyldyǵyn toılaý qarsańynda Volokolamsk qalasynda Qapshaǵaı qalasynyń ákimi Sajan Kıkımov pen RF Volokolamsk qalasynyń basshysy Vasılıı Sharov arasynda yntymaqtastyq týraly kelisimge qol qoıylyp, eki qala baýyrlas qalalar atandy.

Óz sózinde V.Sharov: «Basymyzǵa bult tóngende Qazaqstanda qurylǵan Panfılovtyń 316-shy atqyshtar dıvızııasy kómekke keldi», - deı kele, Jeńisti jaqyndatýǵa qazaqstandyqtar da mol úles qosqanyn atap ótti.

V.Sharov qazaqstandyq delegatsııany prezıdent saılaýynyń sátti ótýimen quttyqtady.

Qapshaǵaı qalasynyń ákimi S.Kıkımov 1941-1945 jyldary bolǵan qan maıdanda bizdiń ákelerimiz ben atalarymyz fashısterge qarsy birlese soǵysyp, jeńiske jetkenin aıtyp, búgingi beıbit kún úshin ardagerlerge alǵys aıtty.

Sharada Qapshaǵaıdyń áleýmettik-ekonomıkalyq jetistigi týraly fılm kórsetildi.

Qazaqstandyq delegatsııa batyrlar alleıasynda Keńes Odaǵynyń Batyrlary Ivan Panfılov pen Baýyrjan Momyshulyna gúl shoqtaryn qoıdy. Qazaqstandyqtar Máńgilik alaýda ot tutatyp, 28 panfılovshy batyrlar jerlengen jerdiń topyraǵy salynǵan kapsýlany aldy.

Kelesi kezekti sharada 5 mamyr kúni Qapshaǵaı qalasynda Máńgilik alaýda ot tutatylatyn bolady.