Voleıbolshylarymyzdyń Parıj Olımpıadasyna qatysýǵa múmkindigi qalǵan joq – Ermek Marjyqpaev

<p>&nbsp;Týrızm jáne sport mınıstri Ermek Marjyqpaev voleıbol federatsııasynyń basshylarymen jáne jattyqtyrýshylar shtabymen kezdesý barysynda atalǵan sport túrinen Parıj Olımpıadasyna qatysýǵa múmkindik qalmaǵanyn atap ótti, dep habarlaıdy <a href="https://kaz.inform.kz/" target="_blank" rel="noopener">Kazinform</a> vedomstvonyń baspasóz qyzmetine silteme jasap.&nbsp;</p>

Jıyn barysynda federatsııa ókilderi voleıboldan ulttyq quramalardyń 2023 jylǵy nátıjelerin qorytyndylap, aldaǵy jarystarǵa daıyndyq josparyn tanystyrdy.

Qazaqstanda voleıbol buqaralyq sport túri retinde keń qanat jaıyp keledi. Búginde respýblıka boıynsha 14 myń voleıbol sektsııasy jumys isteıdi. Onda 600 myńnan astam bala atalǵan sport túrimen turaqty shuǵyldanady.

Voleıboldan Qazaqstan ulttyq quramasy eń keıingi iri jarysta súreńsiz óner kórsetip, júldegerler qatarynan kórine almady. Esesine, jaǵajaı voleıbolynan el quramasy úshinshi orynǵa taban tiredi. Voleıbol boıynsha bıylǵy Parıj Olımpıadasyna joldama beretin barlyq irikteý týrnıri aıaqtaldy.

«Voleıbolshylarymyzdyń halyqaralyq arenada kórsetip júrgen nátıjeleri kóńil kónshitpeıdi. Klýbtar arasyndaǵy birinshilikterdi esepke almaǵanda, jerlesterimiz birneshe jyldan beri Azııa chempıonattarynda júldegerler qatarynan kórine alar emes. Erler arasyndaǵy ulttyq quramamyz eń keıingi ret 2017 jyly, áıelder 2005 jyly kúmis medal jeńip alǵan bolatyn. Parıjdegi Olımpııa oıyndaryna qatysý úshin biz álemdik reıtıngte TOP-5 quramanyń qataryna enýimiz kerek ekeni belgili. Alaıda, qazirgi tańda áıelder quramasy álemdik reıtıngte 32-shi, al erler quramasy 59-orynda tur. ıAǵnı, voleıbol sporty boıynsha bizde Parıj Olımpıadasyna qatysýǵa múmkindik joq dep aıtýǵa bolady», - dedi Ermek Marjyqpaev.

Óz kezeginde voleıbol federatsııasynyń ókilderi atalǵan sport túrindegi negizgi problemalar týraly aıtty. Solardyń biri – ulttyq komandanyń jas ereksheligi. Qazirgi ýaqytta komandanyń negizin 30 jastan asqan sportshylar quraıdy. Sondaı-aq sport fýnktsıonerleri elimizdegi Ulttyq lıganyń deńgeıi tómen ekenin, álemdik deńgeıge sáıkes kelmeıtinin aıtty.

Jıyn barysynda mınıstr federatsııa basshylyǵyna voleıbolmen shuǵyldanatyn óńirlerdiń qataryn kóbeıtip, ony keńinen dáripteýdi, sondaı-aq Qazaqstannyń halyqaralyq sport uıymdaryndaǵy ókildigin arttyrý boıynsha jumys júrgizýdi tapsyrdy. Federatsııadan jergilikti birinshiliktiń deńgeıin kóterý talap etildi. Sondaı-aq vedomstvo basshysy jas sportshylardy daıarlaýda jańa tásilderdi engizý qajettigin aıtty.