ASTANA. KAZINFORM – Vetnam astanasy Hanoı qalasynda voleıboldan áıelder quramalary arasynda ótip jatqan AVC Ulttar kýbogynda Qazaqstan jartylaı fınalda alań ıelerimen sheberlik baıqasty.
Ótken jyly osy jarystyń fınalynda qazaqstandyqtardy tize búktirgen Vetnam chempıon bolǵan edi.
Bul joly jartylaı fınalda alǵashqy partııada vetnamdyqtar 25:15 esebimen basym tústi. Ekinshisinde Rıshat Gılıazýtdınovtiń shákirtteri ese qaıyrdy – 25:17. Biraq odan árige shamasy jetpedi – 7:25, 16:25. Vetnam qorytyndy esepti 3:1-ge jetkizip, tabandylyq tanytty.
Osylaısha alań ıeleri fınalǵa joldama alsa, qazaqstandyqtar qola júlde úshin talasady. Qazaqstan quramasynyń qarsylasy Qytaılyq Taıbeı men Fılıppın oıynynan keıin anyqtalady.
Eske sala keteıik, budan buryn voleıboldan Ulttar kýbogynda Qazaqstan jartylaı fınalda Vetnammen oınaıtynyn jazǵan bolatynbyz.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).