ASTANA. KAZINFORM – Vetnam astanasy Hanoı qalasynda voleıboldan áıelder quramalary arasynda ótip jatqan AVC Ulttar kýbogynda Qazaqstan óz tobyndaǵy sońǵy kezdesýin ótkizdi.
Rıshat Gılıazýtdınov jattyqtyratyn qazaqstandyqtar Fılıppın quramasymen V tobyndaǵy birinshi oryn úshin synǵa tústi.
Osyǵan deıin Qazaqstan 12, Fılıppın 10 upaı jınaǵan edi. Sondyqtan qazaqstandyqtarǵa óz tobynda kósh basynda qalýy úshin 2:3 esebimen jeńilse de, jetkilikti edi. Alaıda naǵyz syn sátte fılıppındikter kúsh alyp ketip, des bermedi – 3:0 (25:21, 25:15, 25:19). Buǵan Iranmen ótken oıynda Qazaqstan quramasynyń kapıtany Sana Anarqulovanyń jaraqat alyp qalýy da áser etkendeı.
Osylaısha, V tobynan jartylaı fınalǵa Fılıppın 13 upaımen birinshi, Qazaqstan ekinshi orynmen joldama aldy.
Qazaqstan jartylaı fınalda jarys favorıti – Vetnammen oınaıdy. Ótken jyly fınalda qazaqstandyqtar dál osy quramadan utylǵan edi.
Eske sala keteıik, budan buryn voleıboldan Ulttar kýbogynda Qazaqstan mańyzdy kezdesýde Irandy qapy qaldyrǵanyn jazǵan bolatynbyz.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).