Voleıboldan Qazaqstan chempıonatynda «Jaıyq» aqtóbelikterden qarymta qaıyrdy

<p>PAVLODAR. KAZINFORM &mdash; Pavlodar qalasynda voleıboldan erlerdiń ulttyq lıga komandalary arasynda XXXIII Qazaqstan chempıonatynyń ekinshi týry bir kúndik úzilisten keıin qaıta jalǵasty.</p>

Dúısenbi kúni «Jetisý» (Taldyqorǵan) men kósh sońyndaǵy «Ushqyn-Kókshetaý» alǵashqy bolyp alańǵa shyqty.

Birinshi partııada 18:25 esebimen ese jibergenimen, odan keıin Marat Adryshevtiń shákirtteri kambek jasaı aldy – 25:14, 25:12, 25:9. Jalpy esep – 3:1, «Jetisýdyń» paıdasynda. Budan keıin «Jaıyq» (Oral) men «Aqtóbe» qazirgi tańda kimniń myqty ekendigin anyqtady.

Bıyl Qazaqstan kýbogynyń fınalynda aqtóbelikterdiń oraldyqtardy qapy qaldyrǵany belgili. Sodan soń birinshi týrda asa tartysty ótken matchta Sergeı Trıkozdyń shákirtteri 3:2 esebimen jeńisti julyp alǵan edi.

Bul joly birinshi partııada Vıktor Kozık jattyqtyratyn «Jaıyq» 23:19 esebimen alda turǵanymen, «Aqtóbeniń» baılanystyrýshysy, 42 jastaǵy ýkraınalyq Roman Handrolın dopty sátti bere bildi – 22:23. Biraq «Jaıyq» sapyndaǵy Borıs Kempa esesin jibergen joq – 25:22.

Ekinshi sette aqtóbelikter 9:4 esebimen alǵa ketkenimen, oraldyqtar tarazy basyn teńestirip qana qoımaı, óz degenderine jetti – 26:24.

Úshinshi partııada «Jaıyq» óz múmkindikterin jibergen joq – 25:23. Qorytyndy esep – 3:0. Osylaısha, «Aqtóbeden» qarymta qaıyrǵan oraldyq klýb 25 upaımen týrnırr kestesinde burynǵysha kósh bastap keledi. Qorjynynda 24 upaıy bar «Jetisý» ekinshi orynda.

Aqtóbelikter 17 upaımen ázirge úzdik úshtikti túıindegenimen, búgin «Esildi» utsa, pavlodarlyqtar olardy basyp ozady.

Eske sala keteıik, budan buryn «Býrevestnıktiń» qatarynan úshinshi ret jeńiske qol jetkizgenin jazǵan bolatynbyz.