Voleıboldan el chempıonatynda «Jaıyq» klýby alty ret qatarynan jeńiske jetti

<p>PAVLODAR. KAZINFORM &mdash; Pavlodar qalasynda voleıboldan erlerdiń ulttyq lıga komandalary arasynda XXXIII Qazaqstan chempıonatynyń oıyndary jalǵasýda.</p>

Buǵan deıin bes ret qatarynan jeńiske jetip, kósh basyna shyqqan Oraldyń «Jaıyǵy» juma kúni Alekseı Terenın jattyqtyratyn «Esil» (SQO) komandasymen kúsh synasty.

Birinshi partııa 25:17 esebimen Vıktor Kozıktiń shákirtteriniń paıdasyna sheshildi. Esesine ekinshisinde «Esil» ese qaıtardy – 25:22. 

Úshinshi partııada da soltústikqazaqstandyqtar alǵa shyǵyp, «Jaıyqqa» upaı joǵaltý qaýpi tóndi. Mine, osy sátte V.Kozık komanda kapıtany, Oral voleıbolynyń túlegi Vıtalıı Vorıvodın men baılanystyrýshy, ýkraınalyq Volodımır Kovalchýktyń ornyna reseılik Borıs Fıstıýlev pen qazaqstandyq Ýmıd Nabıevti alańǵa shyǵardy. Bul oıynshylar oıynǵa tyń lep qosa bildi – 25:23. Sońǵy partııa 25:20 esebimen aıaqtaldy. Qorytyndy esep – 3:1.

Osylaısha, qatarynan altynshy ret qarsylastaryn qapy qaldyrǵan «Jaıyq» 19 upaımen týrnır kestesinde ázirge birinshi orynda keledi.

«Jetisý» 18 upaımen ekinshi satyda tur. Keshe kútpegen jerden «Býrevestnıkten» utylyp qalǵan Marat Adryshevtiń komandasy búgin «Atyraýdan» aılasyn asyrdy – 3:0 (25:17, 26:24, 25:14). 

Bıylǵy kýbok pen sýperkýbok ıegeri «Aqtóbe» (bas bapkeri Sergeı Trıkoz) kósh sońyndaǵy «Ushqyn-Kókshetaýdy» 3:0 (25:11, 25:20, 25:15) esebimen tize búktirip, birinshi týr qorytyndysy boıynsha 17 upaımen úzdik úshtikti túıindedi.

Eske sala keteıik, budan buryn voleıboldan Qazaqstan chempıonatynda Oraldyń «Jaıyǵy» kósh bastaǵanyn jazǵan bolatynbyz.