Voleıboldan el chempıonaty: «Jetisý» «Pavlodardan» basym tústi

<p>ATYRAÝ. KAZINFORM &mdash; Atyraý qalasynda voleıboldan erlerdiń ulttyq lıga komandalary arasynda HHHІІІ Qazaqstan chempıonatynyń birinshi týrynda ortalyq kezdesýlerdiń biri &laquo;Jetisý&raquo; (Taldyqorǵan) men &laquo;Pavlodar&raquo; arasynda ótti.</p>

Sergeı Grıbov jattyqtyratyn pavlodarlyqtar ótken chempıonatty kúmis júldemen aıaqtasa, taldyqorǵandyqtar birinshi týrda jeńilmeı kele jatqan edi.

Birinshi partııada Marat Adryshevtiń shákirtteri 25:19 esebimen basym tússe, ekinshisinde pavlodarlyqtar ese qaıyrdy – 25:17. 

Úshinshi set taldyqorǵandyqtardyń paıdasyna sheshildi – 25:18. Olar tórtinshi partııany da asa qarqyndy bastady – 7:0. Pavlodarlyqtar tarazy basyn teńestirgenimen, odan árige shamalary jetpedi – 23:25. Qorytyndy esep – 3:1.

Osylaısha, birde-bir matchynda jeńilmegen «Jetisý» 14 upaımen jekedara top bastady. Taldyqorǵandyqtar erteńgi sońǵy oıynnyń nátıjesine qaramastan, birinshi týrda ozyq shyqty. 
Birinshilik aýtsaıderleri – «Atyraý» men «Ushqyn-Kókshetaý» oıynynda alań ıeleri 3:1 (25:23, 20:25, 25:19, 26:24) esebimen utyp, bastapqy jeńisine qol jetkizdi.

Alǵashqy týrdyń sońǵy kúni «Taraz» - «Jetisý», «Esil» - «Ushqyn-Kókshetaý», «Býrevestnık» - «Jaıyq», «Atyraý» - «Aqtóbe» komandalary ózara sheberlik baıqasady. 

Eske sala keteıik, budan buryn «Jaıyqtyń» el chempıony «Tarazdy»» tize búktirgenin jazǵan bolatynbyz.