Voleıboldan «Aqtóbe» kambek jasap, sýperkýbokty jeńip aldy

<p>ATYRAÝ. KAZINFORM &mdash; Atyraý qalasynda voleıboldan erlerdiń ulttyq lıga komandalary arasynda ótip jatqan HHHІІІ Qazaqstan chempıonatynyń birinshi týry aıasynda &laquo;Taraz&raquo; ben &laquo;Aqtóbe&raquo; sýperkýbok úshin talasty.</p>

ıÝrıı Bashkatov jattyqtyratyn tarazdyqtar bıyl kóktemde el chempıony atansa, Sergeı Trıkozdyń shákirtteri jańa maýsym bastamasynda Qazaqstan kýbogynda úzdik shyqqan edi. 

Foto: Qazaqstan voleıbol federatsııasy

Sýperkýbok úshin qos komanda bapkeri de juma kúngi oıyndarǵa qosalqy quramdy shyǵarǵandyqtan, qarsylastarynan jeńilis taýyp, úsh upaıdy «qurbandyqqa shalyp» jibergen edi.

Birinshi sette tarazdyqtar 25:20 esebimen basym tústi. Ekinshi partııada bastapqyda aqtóbelikter alǵa shyqqanymen, «Taraz» tarazy basyn teńestirip qana qoımaı, óz ústemdikterin kórsetti – 25:22. 

Úshinshi kezeńdi aqtóbelikter óz esebine jazdy – 25:23. 

Tórtinshisinde esep 4:4 bolǵan mezette reseılik legıoner Nıkıta Shvalev sátti dop bergennen keıin aqtóbelikter alǵa ketti – 9:4. Set bitkenshe sol basymdylyqtan aıyrylǵan joq – 25:17.
Besinshi, sheshýshi partııada aqtóbelikter tórt upaı aıyrmashylyǵymen alǵa shyǵyp, sońynda eki matchbolyn paıdalana almady. Biraq óz degenderine jetti – 17:15. Jalpy esep – 3:2, «Aqtóbeniń» paıdasynda.

Osylaısha, aqtóbelikter óz tarıhynda alǵash ret sýperkýbok ıegeri atandy.

Senbi kúni alańǵa shyqqan «Býrevestnık» (Almaty) «Ushqyn-Kókshetaýdy» 3:1 esebimen (25:23, 25:20, 19:25, 25:18) tize búktirip, týrnır kestesinde 8 upaımen ekinshi orynǵa kóterildi. 

Chempıonatty sátsiz bastaǵan atyraýlyqtar bul joly asa tartysty matchta «Esilge» (SQO) 2:3 (22:25, 26:28, 29:27, 25:20, 16:18) ese jiberdi. Qorjynynda bir-aq upaıy bar «Atyraý» «Ushqyn-Kókshetaýmen» birge kósh sońynda keledi. 

Eske sala keteıik, budan buryn voleıboldan Qazaqstan chempıonatynda «Jaıyqtyń» qarsylasyn jeńgenin jazǵan bolatynbyz.