ORAL. KAZINFORM – Oral qalasyndaǵy «Jaıyq arena» sport kesheninde voleıboldan erlerdiń ulttyq lıga komandalary arasynda Qazaqstan chempıonaty 3-úlken týrynyń oıyndary ótip jatyr.
Dúısenbi kúni birinshilikte kósh bastap kele jatqan «Jetisý» komandasy «Esilmen» (SQO) kezdesti.
Marat Adryshev jattyqtyratyn taldyqorǵandyqtar ótken jyly 29 qarashada el chempıony Oraldyń «Jaıyǵyna» 1:3 esebimen ese jibergennen keıin jeńilissiz kele jatqan edi.
«Jetisý» soltústikqazaqstandyqtardy 3:0 (25:19, 25:19, 25:16) esebimen qınalmaı jeńdi. Sóıtip jeńis serııasyn alty matchqa jetkizdi. Sondaı-aq «Aqtóbe» klýby «Tarazdy» 3:1 (25:18, 25:15, 27:29, 27:25) esebimen tize búktirdi.
Atyraýlyqtar «Býrevestnıkten» (Almaty) basym tústi – 3:0 (25:17, 25:21, 25:21). Alań ıeleri «Jaıyq» klýby «Ushqyn-Kókshetaýdan» aılasyn asyrdy – 3:0 (25:16, 25:16, 25:19).
«Jetisý» 50 upaımen jeke-dara kósh bastasa, «Aqtóbe» (43 upaı) ekinshi, «Atyraý» (41) úshinshi, «Jaıyq» (38) tórtinshi orynda keledi.
Básekeler 11 aqpan, sársenbi kúni jalǵasady.
Eske sala keteıik, budan buryn voleıboldan «Jetisý» erler komandasynyń sýperkýbok ıegeri atanǵanyn jazǵan edik.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).