PAVLODAR. KAZINFORM — Pavlodar qalasynda voleıboldan erlerdiń ulttyq lıga komandalary arasynda ekinshi týr oıyndary máresine jetti.
Jyldyń sońǵy kezdesýinde vıtse-chempıon «Pavlodar» men Oraldyń «Jaıyǵy» alańǵa shyqty.
Birinshi partııada Vıktor Kozık jattyqtyratyn oraldyqtar 25:22 esebimen basym tústi.
Ekinshisinde alań ıeleri dál sondaı eseppen ese qaıyrdy. Budan keıin «Jaıyq» des bergen joq — 25:20, 25:18. Qorytyndy esep — 3:1.
Osylaısha, qatarynan on jeńiske qol jetkizgen «Jaıyq» 31 upaımen jekedara kósh bastasa, «Pavlodar» (22 upaı) besinshi orynda qaldy.
Ekinshi týr qorytyndysy boıynsha oraldyqtardan baılanystyrýshy, ýkraınalyq Volodımır Kovalchýk, pavlodarlyq klýbtan reseılik Nıkıta Kozlov úzdik oıynshy retinde eskertkish syılyqpen marapattaldy.
Endi ulttyq lıga komandalary jańa jylda 20 qańtarda Taldyqorǵan qalasynda bas qosady.
Eske sala keteıik, budan buryn «Býrevestnıktiń» Pavlodarda alty kezdesýdiń beseýinde jeńiske jetkenin jazǵan bolatynbyz.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).