TALDYQORǴAN. KAZINFORM – Taldyqorǵan qalasynda voleıboldan erlerdiń ulttyq lıga komandalary arasynda Qazaqstan chempıonatynyń úshinshi týrynda ortalyq kezdesý «Jaıyq» pen «Aqtóbe» arasynda ótti.
Vıktor Kozık shákirtteri osyǵan deıin qatarynan 15 oıynynda jeńiske jetken edi.
Oraldyqtar 21 qarasha kúni birinshi týrda Sergeı Trıkoz jattyqtyratyn aqtóbelikterge 2:3 esebimen ese jibergen edi. Onyń aldynda Qazaqstan kýbogynyń fınalynda da «Aqtóbeden» utylyp qalǵan bolatyn.
Bul joly birinshi partııada aqtóbelikter 25:17 esebimen basym tússe, oraldyqtar ekinshisinde ese qaıyrdy – 25:18.
«Jaıyq» sapynda oınaıtyn reseılik Mıhaıl Morov jaraqat alǵannan keıin onyń ornyna Oral voleıbolynyń túlegi Aıdyn Ádilbekov shyqty. Basqalaı da almasýlar boldy. Biraq búgin aqtóbelikter des bermedi – 25:19, 25:22. Qorytyndy esep – 3:1.
Osy oıynnan keıin «Jaıyq» 46 upaımen birinshi orynda qalǵanmen, «Aqtóbe» (38 upaı) bir taban jaqyndaı tústi.
Eske sala keteıik, budan buryn «Atyraýdyń» el chempıony «Tarazdy» utqanyn jazǵan bolatynbyz.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).