Voleıbol: Olımpıadaǵa irikteý kezeńinde Qazaqstan qyzdary úshinshi oryn aldy
Búgingi Taıvanmen kezdesýde qazaqstandyq qurama jaqsy oıyn órnegin kórsete bildi. Alǵashqy sette qarsylasynan 25:21 esebimen basym tústi. Odan keıin Taıvan qyzdary 25:22 esebimen jeńip, jalpy esepte tarazy basyn teńestirdi. Úshinshi sette qazaqstandyq voleıbolshylar qarsylasyn 25:21 esebimen tize búktirdi. Nátıjesinde jalpy esepte taǵy da alǵa shyqty. Sońǵy sette qazaqstandyq voleıbolshylar qarsylasyn 27:25 esebimen jeńdi. Jalpy esepte 3:1 esebimen basym túsken olar irikteý kezeńinde úshinshi oryn aldy.
Qazaqstan quramasy irikteý kezeńinde V tobynda synǵa tústi. Aldymen Iran men Indonezııadan 3:0 esebimen basym túsip, sońǵy oıynda Ońtústik Koreıadan sol eseppen jeńilip qaldy. Óz tobynda ekinshi oryn alǵan qazaqstandyqtar osylaısha jartylaı fınalǵa shyqqan bolatyn.
Jartylaı fınalda Qazaqstan quramasy Taılandtan jalpy esepte 1:3 esebimen jeńilip, fınalǵa taılandtyqtar joldama aldy.
Qazaqstan qyzdary 2008 jyly Olımpıada oıyndaryna qatysyp, onda jalpy komandalyq esepte toǵyzynshy oryn alǵan edi.
Azııa qurlyǵynan irikteý kezeńi arqyly Olımpıadaǵa bir joldama beriledi. Búgin fınalda Ońtústik Koreıa men Taıland quramalary básekege túsedi.
Dúbirli dodada barlyǵy 12 quram baq synaıdy. Búgingi kúnge deıin Olımpıadada synǵa túsýge Japonııa, Serbııa, Qytaı, AQSh, Brazılııa, Reseı, Italııa, Kenııa, Argentına quramalary joldama aldy. Olardyń qataryna búgin Eýropa, Azııa jáne Soltústik Amerıkada irikteý kezeńinen jeńimpaz atanǵan quramalar qosylady.