ORAL. KAZINFORM – Oraldaǵy «Jaıyq arena» sport kesheninde voleıboldan erlerdiń ulttyq lıga komandalary arasynda Qazaqstan chempıonatynyń qola júldegeri anyqtaldy.
Qola júlde úshin bıyl «Atyraý» jáne «Jetisý» komandalary talasty. Birinshi kezdesýde Marat Adryshev jattyqtyratyn taldyqorǵandyqtar 3:1 esebimen jeńiske jetse, ekinshisinde Islam Jumabekovtiń shákirtteri ese qaıyrǵan edi — 3:1.
Bul joly «Atyraý» aıqyn basymdylyq tanytyp, 3:0 (25:15, 25:14, 25:14) esebimen jeńiske jetti. Osylaısha, olar úzdik úshtikke ilikse, «Jetisý» tórtinshi orynǵa taban tiredi.
Maýsym barysynda «Atyraýdy» jattyqtyrǵan serbııalyq maman Deıan Výlıchevıch ketip, komanda quramynda birqatar ózgeris bolǵan edi. Sonyń ózinde Islam Jumabekov baptaǵan atyraýlyqtar qola júldege qol jetkize bildi.
Eske sala keteıik, budan buryn voleıboldan Qazaqstan chempıonatynda qola júlde úshin básekede «Atyraýdyń» esepti teńestirgenin jazǵan bolatynbyz.
Sondaı-aq altyn úshin talasta «Jaıyq» klýby kambekpen «Aqtóbeni» jeńdi.
Ǵaısaǵalı Seıtaq
1980 jyly A. Pýshkın atyndaǵy Oral pedagogıkalyq ınstıtýtyn (M. Ótemisuly atyndaǵy BQÝ) qazaq tili men ádebıeti mamandyǵy boıynsha bitirgen. Tasqala aýdandyq «Ekpin» gazetinde tilshi, bólim meńgerýshisi boldy. Oblystyq «Oral óńiri» gazetinde tilshilikten bas redaktorlyqqa deıingi joldan ótti. «Jaıyq Press» JShS bas dırektorynyń birinshi orynbasary qyzmetin atqardy. 2000 jyldan beri Kazinform halyqaralyq aqparat agenttiginiń BQO-daǵy menshikti tilshisi. Qazaqstan Jazýshylar jáne Jýrnalıster odaǵynyń múshesi. Respýblıkalyq «Jalyn» jýrnaly belgilegen Tólegen Aıbergenov atyndaǵy syılyqtyń (1987) jáne sport jýrnalısteri arasynda Seıdahmet Berdiqulov atyndaǵy syılyqtyń laýreaty (2015). «Eren eńbegi úshin» medaliniń ıegeri. Halyqaralyq «Alash» ádebı syılyǵynyń laýreaty (2024).